На самай справе ёсць два віды байкшэрынгу: калі веласіпед неабходна вярнуць на спецыяльную аўтаматызаваную станцыю і калі яго можна пакінуць абсалютна ў любым месцы. У ТАА «МотаВелаЗавод» вывучылі вопыт іншых краін і палічылі, што першы варыянт больш падыходзіць для Мінска. Намеснік дырэктара прадпрыемства Максім Цуран тлумачыць чаму:
— Ідэя стварыць байкшэрынг у Мінску з’явілася ў нас тры гады таму. Далей мы знайшлі партнёра для распрацоўкі праграмнага забеспячэння — беларускую ІТ-кампанію «Сіматэк Энерга». Перад намі стаў выбар: зрабіць пракат са станцыямі або без іх. Параіліся з калегамі з Еўрапейскага саюза: аказалася, там ужо падалі заяву ў Еўрапарламент, каб прыпыніць развіццё байкшэрынгу без станцый. Чаму? Грамадзяне веласіпеды пакідаюць абы-дзе, гарадское асяроддзе, можна так сказаць, засмечваецца. Можа, шмат каму і здаецца, што кінуць веласіпед каля пад’езда было б прасцей, але гэта стварае нязручнасці тым, хто велатранспартам не карыстаецца. У выніку спыніліся на праекце пракату са станцыямі, заручыўшыся падтрымкай мінскай ДАІ.
Пакуль што ў сталіцы працуюць толькі тры аўтаматызаваныя станцыі велапракату — каля Палаца спорту, Футбольнага манежа і «Мінск-Арэны». Веласіпедысты могуць пракаціцца ўздоўж праспекта Пераможцаў, дзе праходзіць галоўная веламагістраль горада. У будучым арганізатары праекта плануюць размясціць па Мінску каля 120 пунктаў аўтаматычнага пракату, кожны з iх — на 15 веламесцаў.
— Чакаем дазволу Мінгарвыканкама на ўстаноўку станцый. Плануем, што да наступнага веласезона ў Мінску іх будзе ўжо 50. На зіму такія паркоўкі звычайна кансервуюцца. Нашым праектам ужо зацікавіліся і ў іншых гарадах краiны — у Брэсце, Гродне, Оршы. Плануем папулярызаваць беларускі байкшэрынг і ў Расіі. Дарэчы, акрамя таго, што самі веласіпеды нашай вытворчасці, праграмнае забеспячэнне і станцыі таксама створаны ў Беларусі, — удакладняе Максім Цуран.
Мэта байкшэрынгу — стварыць умовы для таго, каб веласіпед стаў не толькі забаўкай, але і паўнавартасным сродкам перамяшчэння па горадзе. Кошт пракату арганізатары праекта набліжаюць да аднаразовай паездкі ў метро ці тралейбусе. 30 хвілін паездкі абыдуцца ў 65 капеек. Як гэта ўсё працуе? Аўтаматызаваная станцыя — такая велапаркоўка, абсталяваная спецыяльнай прыладай-замком. На кожнай ёсць інструкцыя з неабходнай інфармацыяй. Нічога складанага: для арэнды трэба ўсяго толькі ўсталяваць мабільны дадатак і ўвесці даныя банкаўскай карткі. Пасля пацвярджэння аплаты замок адкрываецца, веласіпед — ваш. Сэрвіс працуе кругласутачна, таму праблемы вярнуць байк на станцыю не будзе. Праверыць, ці ёсць у пункце пракату свабодныя веламесцы, можна праз тую ж мабільную праграму.
— Пакуль што пад пілотны праект мы выдзелілі 40 веласіпедаў, неўзабаве іх колькасць наблізіцца да 200. У пракаце прадстаўлена мадэль Aist Tracker 2.0, якую мы спецыяльна распрацавалі для байкшэрынгу. У гэтым веласіпедзе прадугледжаны нестандартны дыяметр падсядловага штыра. Па-першае, каб не было сэнсу красці запчасткі. Па-другое, каб скарыстацца пракатам мог чалавек любой камплекцыі, любога росту — можна лёгка адрэгуляваць сядзенне па вышыні. У гэтай мадэлі выкарыстоўваецца антывандальная гума, веласіпеды плануем абсталяваць GPS-сігналам і дадаць кошык для рэчаў. Акрамя таго, яны вылучаюцца колерам — пафарбаваны ў ярка-аранжавы, — гаворыць Максім Цуран.
Да верасня прадпрыемства выпусціць першыя электравеласіпеды. Да наступнага веласезона яны могуць папоўніць станцыі аўтаматычнага велапракату. Паездка на двухколавым электратранспарце абыдзецца крыху даражэй, чым на звычайных веласіпедах.
Дарэчы, на днях у сталіцы запрацаваў і першы сэрвіс велапракату, але без станцый — у самых розных пунктах горада можна заўважыць ярка-жоўтыя веласіпеды. Арэнда — праз мабільны дадатак, які пакуль што даступны толькі для карыстальнікаў Android. Гадзіна паездкі на звычайным веласіпедзе — 2 рублі, на электравеласіпедзе — 10 рублёў.
Бясспрэчна, веласіпеднае асяроддзе з кожным годам у нашай краіне становіцца ўсё больш камфортным. Расце колькасць пунктаў пракату, пашыраецца сетка спецыяльных дарожак, з’яўляюцца новыя паркоўкі і гаражы для двухколавага транспарту, а ў Мінску нядаўна выдзелілі паласу для веласіпедыстаў на праезнай частцы. Па краіне ўжо калясяць каля 1,5 мільёна аматараў экалагічнага транспарту. Больш за ўсё веласіпедыстаў у Мінску — каля 800 тысяч. Гэта амаль 40 працэнтаў жыхароў сталіцы.
