Трэнд на здаровы лад жыцця набірае абароты

Фізкультурай і спортам рэгулярна займаюцца 22,5 працэнтаў жыхароў краіны, а гэта больш за 2 мільёны чалавек. Мы ўсё больш імкнёмся да актыўнага ладу жыцця, і для гэтага ёсць усе ўмовы: у краіне налічваецца больш за 23 тысячы фізкультурна-спартыўных збудаванняў, іх наведвальнасць з кожным годам расце. Трэнд на здаровы лад жыцця набірае абароты. Мы пацікавіліся ў нашых чытачоў, як менавіта яны трымаюць сябе ў форме.

— Спортам займаюся нерэгулярна, але пры першай жа магчымасці. Хаджу на аэробіку, потым у саўну і басейн. Добра, зараз гэта не каштуе шалёных грошай: спартзалы завабліваюць выгаднымі прапановамі, робяць скідкі і даюць бонусы. Займаюся для здароўя і фігуры, а яшчэ памяць трэнірую. Дзесьці прачытала: фізкультура дапамагае жанчынам запамінаць новую інфармацыю. Навукоўцы правялі эксперымент: добраахвотніцы запаміналі імёны мужчын — адна група пасля гэтага ішла займацца аэробікай, іншая адпачывала. Даследаванне паказала: актыўныя жанчыны нашмат лепш запомнілі інфармацыю.

— З дзяцінства прафесійна займаўся баскетболам. Потым нешта запусціў, патаўсцеў, і тады зноў узяўся за справу. Праўда, зараз трэніруюся не ў камандзе, а толькі для сябе. Косткі размяць, мяч паганяць. Для мяне гэта лепшы сродак ад стрэсу: загрузіў цела, выключыў галаву… Так і адпачываю. Дарэчы, спорт карысны і для барацьбы з курэннем. Не толькі з псіхалагічнага, але і з фізіялагічнага боку. Даследаванні навукоўцаў паказалі, што фізічныя практыкаванні аднаўляюць актыўнасць пэўных рэцэптараў і дапамагаюць перажыць «сіндром адмены», які з’яўляецца ў былых курцоў.

— Урачы рэкамендуюць займацца фізкультурай, каб так змагацца са старэннем сардэчна-сасудзістай сістэмы. Вядомы факт: рэгулярныя заняткі спортам памяншаюць рызыку заўчаснай смерці. У актыўных людзей спажыванне кіслароду падчас фізкультуры вырастае на 18 працэнтаў, а гнуткасць сардэчнай мышцы павышаецца на 25. Пры сядзячым ладзе жыцця сардэчная мышца дубянее, што негатыўна адбіваецца на кровазабеспячэнні ў арганізме. Асабіста я вельмі люблю трэніроўкі — часта наведваю трэнажорную залу. Калі часу на перамяшчэнні па горадзе няма, застаюся займацца дома: па роліках з Ютуба.

— Спорт, як вядома, не толькі дапамагае пазбавіцца ад лішняга тлушчу і цэлюліту, але яшчэ ратуе ад хандры. Любая фізічная актыўнасць павялічвае выпрацоўку эндарфінаў, і настрой павышаецца. Як кажуць псіхіятры, рэгулярныя прабежкі і зарадка часта больш эфектыўныя, чым антыдэпрэсанты ў таблетках. Лічыцца, што аматары спорту на 25 працэнтаў радзей пакутуюць ад апатыі і прыніжанай самаацэнкі, чым пасіўныя людзі. Я, напрыклад, шмат часу праводжу за пісьмовым сталом. Але па выхадных, а часам і ў буднія дні па вечарах іду гуляць у футбол. Гэта сапраўдны кайф: цела працуе, а галава потым свежая. Лепшы адпачынак.

— Я не фанат трэнажоркі і спартзалы. Затое люблю катацца на веласіпедзе: езджу на працу, на сустрэчы з сябрамі — куды заўгодна. Імкнуся пазбягаць паездак на грамадскім транспарце, таму часта хаджу пешшу.  Я ўжо заўважыла: падчас прагулкі ў мяне заўсёды прыток ідэй. Нават павольны шпацыр вакол офіса мне прыносіць велізарнае задавальненне і карысць. Дарэчы, неяк натрапіла на вынікі даследавання са Стэнфардскага ўніверсітэта: там з дапамогай розных эксперыментаў выявілі, што хадзьба можа павысіць творчы патэнцыял да 60 працэнтаў. Актыўныя людзі штодзень натхняюцца, знаходзяць новыя шляхі вырашэння праблем. Так што хопіць сядзець на месцы!

Юлія IОСIФАВА