Белорусская земля дала миру немало талантливых художников

Нашы парыжане

Парыжская школа — унікальны феномен у гісторыі мастацтва ХХ стагоддзя, які аб’ядноўвае творчасць выдатных майстроў з розных краін. Нямала сярод іх і беларусаў. Гэта не толькі вядомыя на ўвесь свет Марк Шагал ці Хаім Суцін, але і менш знакамітыя Восіп Цадкін, Міхаіл Кікоін, Пінхус Крэмень, Восіп Любіч, Роберт Генін і іншыя таленавітыя мастакі, імёны якіх адкрыліся нам не так даўно.

Восiп Любiч. «Дзве жанчыны ў пакоi». 1924 г.
nlb.by

Жыццё рознымі шляхамі прывяло гэтых людзей у французскую сталіцу, розныя лёсы напаткалі іх, але ўсіх аб’ядноўвала жаданне вучыцца, ствараць і радаваць іншых сваім мастацтвам. Нягледзячы на голад, хваробы, матэрыяльныя цяжкасці і творчыя крызісы, яны здолелі стаць у адзін шэраг з карэннымі французамі і ўзбагаціць Парыжскую школу нацыянальнымі адценнямі.

Падрабязна пра беларускіх прадстаўнікоў Парыжскай школы з нядаўняга часу можна даведацца на сайце Нацыянальнай бібліятэкі nlb.by. Віртуальная выстава носіць назву «Парыжскі «Вулей»: сустветна вядомыя мастакі з Беларусі». Экспазіцыя ўключае галерэю найбольш значных твораў аўтараў, фотаздымкі, літаратуру з фондаў бібліятэкі, а таксама знаё­міць з цікавымі фактамі з жыцця мастакоў, успамінамі іх сяброў, меркаваннямі сучаснікаў. Гэта дазваляе зразумець, якімі таленавітымі творцамі і неардынарнымі асобамі яны былі.

Пiнхус Крэмень. «Вулей». 1916 г.
nlb.by

Да прыкладу, Восіп Цадкін стаў адным з родапачынальнікаў кубістычнай скульптуры з завостранымі фігурамі, увагнутымі паверхнямі, геаметрызмам форм. Яго творы ўпрыгожылі Парыж, Ратэрдам, Амстэрдам, Іерусалім і іншыя гарады. Пінхус Крэмень праславіўся ў першую чаргу сваімі натурнымі пейзажамі, сярод якіх цэлы шэраг відаў невялікага французскага горада Серэ, дзе мастак жыў з сям’ёй. А Восіп Любіч быў зачараваны загадкавымі акрабатамі, эквілібрыстамі, наезнікамі, танцоркамі, клоўнамі, таму цэнтральнае месца ў яго творчасці занялі тэатральныя і цыркавыя тэмы.

Пакуль з праектам можна пазнаёміцца на беларускай мове, але хутка, удакладняюць аўтары, будзе даступна і рускамоўная версія.

mila@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter