Галасістымі спевамі сустракаюць пеўні на камайскіх падворках Марыну КАРАВАЦКУЮ. Другі год яна працуе паштальёнам. Марына Вітольдаўна шчыра прызнаецца, што ў кожны дом крочыць з любоўю. Усіх жыхароў аграгарадка Камаі Пастаўскага раёна яна добра ведае. Тут скончыла сярэднюю школу. Прафесію швачкі атрымала ў полацкім прафтэхвучылішчы. Вярнулася дамоў і працавала ў швейным цэху камбіната бытавога абслугоўвання. Выйшла замуж. Нарадзіліся сын, а потым дачка. Пасля адкрыцця ў камайскай гаспадарцы буйнога свінакомплексу памяняла прафесію. За чвэрць стагоддзя стараннай працы аператарам у цэху абнаўлення пагалоўя неаднойчы адзначалася кіраўніцтвам сельгаспрадпрыемства.
У аддзяленні паштовай сувязі, якім дзясяты год кіруе Іна Навумчык, два паштальёны. Жыхароў суседняй вёскі Гваздавічы абслугоўвае Зоя Гасперская. Дзякуючы старанню паштовых работнікаў тут значна пабольшала падпісчыкаў «Сельской газеты». Толькі ў аграгарадку сёлета паўтара дзясятка сямей атрымліваюць яе. Пастаянныя падпісчыкі нашага выдання Лілія Конан, Іван Шарак, Іван Траццяк і іншыя. Спадзяемся, колькасць сяброў газеты ў Камаях і надалей будзе павялічвацца.
subbat50@mail.ru
Фота аўтара