Карціну паспелі ўжо ахрысціць першым айчынным баевіком. Яна распавядае пра барацьбу з бандытызмам у пасляваенныя гады. Фільм стаў мастацкай рэканструкцыяй рэальных падзей, апісаных у кнізе палкоўнікам міліцыі Мікалаем Ільінскім “У надзвычайнай сітуацыі — знішчыць”. Падзеі разгортваюцца ў 1946 годзе. Страшэнная вайна скончылася, але пачалася іншая — са злачынцамі...
— Мне здаецца, што традыцыі “Беларусьфільма” працягваюцца, — кажа рэжысёр карціны Аляксандр Анісімаў. — Я працаваў з вялікім задавальненнем. Падабралася выдатная каманда.
На прэм’еру прыйшлі супрацоўнікі праваахоўных органаў на чале з міністрам унутраных спраў Ігарам Шуневічам. Стужка яму спадабалася:
— У фільме ёсць усё: экшэн, гістарычная праўда, вобраз звычайнага міліцыянера. Ёсць і пераемнасць — я знайшоў шмат паралеляў з сучасным жыццём.
У карціне здымаліся выключна беларускія акцёры. Сярод іх Арцём Курэнь, Пётр Юрчанкаў, Ігар Дзянісаў, Ігар Сігаў, Віктар Манаеў, Зоя Белахвосцік, Вераніка Пляшкевіч, Сяргей Юрэвіч, Таццяна Чардынцава і іншыя.