Зараз у Мінску актыўна будуюцца чатыры станцыі трэцяй лініі метро: «Юбілейная плошча» (побач з «Фрунзенскай»), «Плошча Францішка Багушэвіча» (каля музычнага тэатра), «Вакзальная» (з выхадам на дыспетчарскую станцыю «Дружная» і пераходам на «Плошчу Леніна»), «Кавальская Слабада» (у раёне вуліцы Жукоўскага). Паведамлялася, што іх адкрыюць у першай палове 2020 года, а пробны цягнік пусцяць у студзені.
Як расказалі ва УП «Дырэкцыя па будаўніцтве Мінскага метрапалітэна», тры станцыі сёння маюць дастаткова высокую ступень гатоўнасці. «Кавальская Слабада» амаль закончана. Да мастацкага аздаблення яшчэ не прыступалі — дарэчы, над ім працуюць лепшыя мастакі краіны, але канструкцыі ўжо збудавалі, зараз ідзе мантаж сістэм, якія забяспечваюць бяспеку эксплуатацыі. На «Вакзальнай», адзінай у Мінску станцыі метро з наземным вестыбюлем, скончаны асноўныя будаўніча-мантажныя работы, зараз ідзе аздабленне, паралельна вядзецца мантаж сістэм. На «Плошчы Францішка Багушэвіча» гатова асноўная частка канструкцый. На «Юбілейнай плошчы» выкананы тупікі, заканчваюцца работы на станцыі, затым будуць рабіць уваходы і шляхі перасадкі.
Далей будаўнікі метро рушаць у бок Курасоўшчыны — у тым напрамку плануецца збудаваць яшчэ тры станцыі. Толькі пасля гэтага землепраходніцкі шчыт ад «Юбілейнай плошчы» павернецца ў бок Зялёнага Луга, каб там можна было збудаваць сем станцый.
Як вядома, Зялёналужская лінія метро будзе перасякацца з Маскоўскай лініяй і Аўтазаводскай. Зараз на станцыі «Плошча Леніна» закрыты вестыбюль № 2 — выхад у бок плошчы Незалежнасці. Там праводзяць работы па аб’ектах прымыкання, працу абяцаюць скончыць 10 жніўня. Першую і трэцюю лініі метро злучаць два пешаходныя тунэлі, у кожным з якіх будуць і травалатары — рухомыя дарожкі без прыступак, што дазваляюць паскорыць і аблегчыць перамяшчэнне пешаходаў. Для аналагічных работ на перагоне паміж «Фрунзенскай» і «Маладзёжнай» спатрэбіцца на нейкі час закрыць рух ад «Фрунзенскай» да «Каменнай Горкі», але даты пакуль не вызначаны.
ДАРЭЧЫ
Зялёналужская лінія метро будзе мець працягласць 17,2 км і налічваць 14 станцый.
nevmer@sb.by
Полная перепечатка текста и фотографий запрещена. Частичное цитирование разрешено при наличии гиперссылки. Заметили ошибку? Пожалуйста, выделите её и нажмите Ctrl+Enter
