Минск
+13 oC
USD: 2.04
EUR: 2.27

За пять минут до каникул: насколько хорошо водители знают «летние» правила дорожного движения

На светлым баку вуліцы

Заўтра ў школьнікаў пачнуцца летнія канікулы, і дваровае жыццё забурліць. Пакуль бацькі на працы, дзеці будуць забаўляць сябе як могуць. Велікі, ролікі, скейты, самакаты, гіраскутэры і іншая ўпадабаная імі тэхніка. Аднак не ўсе дзяўчынкі і хлопчыкі аднолькава добра засвоілі правілы дарожнага руху. Таму дарослым на дарогах трэба быць асабліва пільнымі. Менавіта для папярэджання аварый з удзелам дзяцей ДАІ напярэдадні летніх канікул праводзіць маштабную акцыю «Увага — дзеці!». У гэты час вадзіцелі абавязаны рухацца з уключаным блізкім святлом фар незалежна ад часу сутак. Карэспандэнт «Р» разам з інспектарамі падзяжурыла на мінскіх вуліцах і даведалася, чаму некаторыя вадзіцелі ігнаруюць патрабаванне ўключаць фары.

Спыняемся каля пешаходнага перахода і праз хвіліну ўжо тармозім першага парушальніка.

  Адпраўляемся на Старавіленскі тракт. Школьнікаў тут заўсёды поўна: непадалёк размешчаны Мінскі дзяржаўны палац дзяцей і моладзі, куды прыязджаюць дзяўчынкі і хлопчыкі з усяго горада.

— На канікулах школьнікі будуць больш часу праводзіць на вуліцы, а значыць, вадзіцелям варта быць яшчэ больш уваж­лівымі, — па дарозе інспектар ДПС АДАІ Цэнтральнага РУУС Мінска Ілья Гарэлік апісвае сутнасць праблемы. — У сярэднім 70 працэнтаў дзяцей атрымліваюць траўмы на дарогах з мая па кастрычнік. Найбольшая колькасць здарэнняў з іх удзелам у летні перыяд фіксуецца з пятніцы па нядзелю. Характэрна, што большасць аварый адбываецца па віне вадзіцеляў.

Спыняемся каля пешаходнага пераходу і праз хвіліну ўжо тармозім першага парушальніка. Вадзіцель серабрыстага «Фольксвагена» робіць выгляд, што нічога не разумее:

— Якая акцыя? Не, не чуў...

— Падчас акцыі вадзіцелі абавязаны рухацца з уключаным блізкім святлом фар у любы час сутак. За невыкананне патрабавання прадугледжана адказнасць — папярэджанне ці штраф да 2 базавых велічынь, — кажа парушальніку Ілья Гарэлік.

Атрымаўшы на першы раз штраф у палову базавай велі­чыні, мужчына махнуў рукой і паехаў. Фары, зразумела, уключыў. Наступны парушальнік пра акцыю чуў, але фары яго сіняга мінівэна чамусьці не гараць.

— Ды я жыву тут, — паказвае рукой у бок шматпавярховага дома ў Нававіленскім завулку. — Выязджаю са двара, а тут вы. Проста не паспеў уключыць...

Інспектар паставіўся да парушальніка з разуменнем і на першы раз абмежаваўся строгім папярэджаннем.

Інспектар пакуль аб­межаваўся строгім папярэджаннем. Папярэджанне атрымаў і наступны парушальнік, які забіраў сына з сярэдняй школы № 37. Пра фары, паводле яго слоў, запамятаваў.

Святлафор на скрыжаванні Старавіленскага тракту і Нававі­ленскай вуліцы загараецца чырвоным — і паток машын замірае. У гэты момант каля пешаходнага перахода з’яўляецца школьнік у навушніках. Дзіця заліпла ў тэлефоне і нават не паглядзела па баках.

— Як трэба пераходзіць зебру? — Ілья Гарэлік задае хлопчыку элементарнае пытанне на веданне ПДР.

— Спачатку трэба паглядзець направа, потым — налева. Ой, наадварот... Хаця не, пачакайце… — школьнік чухае патыліцу, спрабуючы ўспомніць правілы.

У гэты момант яму тэлефануе мама. Інспектар просіць яе нагадаць сыну правілы перад пачаткам канікул. Мера неабходная, бо ўлетку дзеці большую частку часу праводзяць без нагляду дарослых.

Дзіцячы фактар не варта выключаць: нават самае адказнае дзіця можа здзейсніць неабдуманы ўчынак.

— Дзіцячы фактар ​​не варта выключаць. Нават самае адказнае дзіця можа здзейсніць неабдуманы ўчынак, — разважае Ілья Гарэлік. — Загуляўшыся, школьнік можа і не ўспомніць аб небяспецы, проста выскачыць на дарогу за мячом. Наогул, дзеці часта не пераходзяць, а менавіта перабягаюць дарогу, не пакідаючы вадзіцелю шанцу для манеўру.

Раптам заўважаем на тратуары двух хлапчукоў на веласіпедах. Хацелі пераехаць пешаходны пераход не спешваючыся. Абодвум па дзевяць гадоў. Інспектар папярэдзіў хлопчыкаў, што так рабіць нельга, і адправіў іх катацца на дваровую тэрыторыю.

На маленькіх аматараў ролі­каў, скейтаў і самакатаў распаў­сюджваюцца тыя ж правілы, што і на пешаходаў. Ім можна катацца на дваровых тэрыторыях і па веласіпедных дарожках па баку для руху пешаходаў.

Тым бацькам, у каго дзеці крыху старэйшыя, інспектар параіў не пакідаць ключы ад аўтамабіля ці матацыкла без нагляду. Жадання пакатацца ў падлеткаў многа, а вось навыкаў кіравання не хапае. Пра наступствы такіх заездаў мы даведваемся з навін. Вось выпадак з нядаўняга: у Аршанскім раёне школьнік украў і разбіў чужыя «Жыгулі». Гаспадар машыну не замыкаў, бо думаў, што на яе ніхто не паквапіцца. Падлетак завёў аўто і паехаў катацца па вёсцы, але не справіўся з кіраваннем і ўрэзаўся ў плот. Пасля гэтага ён збег з месца ДТЗ. На падлетка завялі крымінальную справу па факце крадзяжу аўтамабіля.

Напярэдадні канікул інспектар таксама нагадаў бацькам аб неабходнасці бяспечнай перавозкі дзяцей да месцаў летняга адпачынку. Мяркуйце самі: са студзеня па красавік гэтага года 30 дзяцей сталі ўдзельнікамі ДТЗ у якасці пасажыраў, двое з іх загінулі. Пры гэтым кожны другі непаўналетні перавозіўся з парушэннем правілаў. Хоць менавіта ўтрымліваючыя прылады часцяком ратуюць дзецям жыццё. Так здарылася ў красавіку пад Мінскам на з’ездзе з трасы М-14. Аўталэдзі за рулём «Фольксваген Туран», у якім былі трое яе дзяцей, не ўступіла дарогу УАЗу. Дзеці знаходзіліся ў дзіцячых аўтакрэслах, былі прышпіленыя рамянямі бяспекі і дзякуючы гэтаму сур’ёзных цялесных пашкоджанняў пазбеглі.

Назіраем, як многія вадзіцелі ўключаюць фары, толькі заўважыў­шы інспектара. Але гэты трук атрымліваўся не ва ўсіх. Наступныя пяць парушальнікаў з’язджаюць з папярэджаннем, шосты атрымлівае штраф — адна фара перагарэла.

— Перагарэлыя фары і заднія габарытныя агні ў цёмны час сутак і ва ўмовах недастатковай бачнасці прыраўноўваюцца да няспраўнасці. За гэта прадугледжана адказнасць у выглядзе штрафу ад 1 да 3 базавых, — растлумачыў інспектар.

Вынік гадзіннага дзяжурства ў ваколіцах Палаца дзяцей і моладзі: 2 парушальнікі атры­малі штраф, яшчэ 12 — папярэджанне за выключаныя фары.

gorbatenko@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Фото: Александр КУЛЕВСКИЙ
Загрузка...