Феномен Трампа сапраўды існуе. Новы кіраўнік Белага дома працягвае здзіўляць сваімі першымі крокамі на пасадзе кіраўніка Злучаных Штатаў не толькі абывацеляў, але і ўвесь істэблішмент. Нягледзячы на масавыя акцыі пратэсту і выпады палітычных апанентаў.
У амерыканскіх СМІ згадвалася, што “знешнепалітычныя ініцыятывы новай адміністрацыі ЗША наткнуцца на жорсткае супраціўленне амерыканскіх эліт, упэўненых у тым, што Штаты павінны заставацца адзіным “цэнтрам сілы” сучаснага свету”.
І вось першыя дзеянні ў адказ. Рэспубліканец Джон Макейн — першая ластаўка ў гэтым “коле супраціўлення”. Ён упэўнены: рашэнне аб выхадзе ЗША з пагаднення па Трансціхаакіянскім партнёрстве (ТЦП) — вялікая памылка і выгадна толькі Кітаю, які ўмацуе ўласны эканамічны патэнцыял, дамінуючы ў рэгіёне. Узнікла і ініцыятыва сенатара Эдварда Маркі і члена Палаты прадстаўнікоў Тэда Лью, якую яны ўнеслі ў кангрэс ЗША. Сутнасць законапраекта — прэзідэнта Дональда Трампа трэба пазбавіць права на прэвентыўны ядзерны ўдар (так, відаць, яму не давяраюць).
А пакуль Трамп становіцца галоўным антыглабалістам і пачынае энергетычную рэвалюцыю ў ЗША. Прэзідэнт падпісаў указ аб аднаўленні будаўніцтва на тэрыторыі ЗША нафтаправодаў Keystone и Dakota Access (рэалізацыя гэтых праектаў раней была спынена), каб дамагчыся энергетычнай незалежнасці ад Арганізацыі краін-экспарцёраў нафты, скараціць рэгуляванне ў энергетыцы, зрабіць моцны штуршок у галіне здабычы шэльфавага газу і нафты. Калі гэта атрымаецца, плюс узрасце здабыча нафты ў саміх Штатах і будзе фактычна забаронены яе імпарт на тэрыторыю краіны — сусветны нафтавы рынак чакаюць новыя вялікія ўзрушэнні.
У полі зроку новай амерыканскай адміністрацыі — тэма мігрантаў. Мяркуецца, што згодна перадвыбарчым абяцанням Трампа можа адбыцца дэпартацыя з амерыканскай тэрыторыі 11 мільёнаў нелегалаў і распачнецца будаўніцтва “антымігранцкай сцяны” на мяжы з Мексікай. Гаворыцца і аб часовым спыненні прыёму бежанцаў, адмене выдачы віз грамадзянам шэрагу краін Блізкага Усходу і Паўночнай Афрыкі.
Нагадаю, у сваёй інаўгурацыйнай прамове Дональд Трамп запэўніў амерыканцаў: яго прыярытэтам стане росквіт ЗША і вяртанне ўлады народу. Па вобразным выказванні канцлера Германіі Ангелы Меркель (пасля абрання новага кіраўніка ЗША): свет уваходзіць у новую гістарычную эпоху, якая зменіць старое светаўладкаванне, і павінен быць гатовы да вельмі неспакойных часоў.
Вось такія навіны. Сустрэнемся...