Напэўна сарвуць авацыі танцоры і ў Амане, дзе выступяць 4 сакавіка ў межах Дзён культуры Беларусі. «Харошкі» выйдуць на сцэну галоўнай канцэртнай пляцоўкі гэтай краіны — Каралеўскага опернага тэатра Маската. Як правіла, на ёй выступаюць сусветныя выканаўцы самага высокага ўзроўню. Удастоіліся такога гонару і нашы артысты. Яны пакажуць у Амане лепшыя нумары з залатога фонду ансамбля, заснаваныя на багатым фальклорным матэрыяле і беларускай гісторыі.
Як паведамілі ў калектыве, гледачоў чакае сустрэча з сапраўднай беларускай зімой — снежнай і халоднай, але вельмі прыгожай парой года. Пакажуць «Харошкі» і асаблівасці працы і побыту беларускага народа: сяўбу жыта, збор ураджаю, весялосць і танцы з нагоды завяршэння палявых работ.
Унікальны харэаграфічны спектакль «Сакалінае паляванне» з праграмы «Полацкі сшытак» перанясе жыхароў Амана ў «замкавую эпоху» беларускай гісторыі, пазнаёміць са старадаўнімі звычаямі заручын. А музычны нумар «Усходняя фантазія» ў выкананні аркестравай групы ансамбля стане для іх сапраўдным сюрпрызам.
Прадстаўляць нацыянальнае мастацтва Беларусі ў Амане для ансамбля «Харошкі» — вялікі гонар і радасць, лічаць артысты. Гэта выдатная магчымасць паказаць унікальнасць і самабытнасць беларускага народа, яго традыцыі і найбагацейшыя духоўныя каштоўнасці.
mila@sb.by
Фота з асабістага архіва.
mila@sb.by
Фота з асабістага архіва.