Начальнiк Пастаўскага райсельгасхарчу Антон ЧАРВІНСКІ свой рабочы дзень пачынае са зводкі па надоі малака. У ліку тых, хто зрабіў важкі крок наперад, — жывёлаводы ААТ «Навасёлкі-Лучай». Ад кожнай каровы тут атрымліваюць на тры кілаграмы малака больш, чым летась. З пачатку года прыбаўка — 170 кілаграмаў.
Адна з галоўных прычын прыбаўкі — пуск першай чаргі малочна-таварнай фермы «Коўзаны», дзе кароў дояць робаты. Разам з галоўным заатэхнікам гаспадаркі Іванам Кісялём наведваем ферму. У цэху 400 кароў, не адчуваецца паху аміяку. У прадаўгаватай зале ўстаноўлены шэсць робатаў, па тры з кожнага боку.
Аператар МТФ «Коўзаны» Вікторыя ВАРТАЗАРАН.
— «Астранаўт-4» фірмы «Біяком», — знаёміць з аўтаматычнымі работнікамі малады загадчык фермы Леанід Дунец. — Кожны можа абслугоўваць да 70 кароў. Прычым не толькі падмывае вымя, выдае камбікармы ў залежнасці ад прадукцыйнасці, доіць, але і вызначае стан жывёлы. Калі карова прыхварэла, малако накіроўваецца ў асобны посуд. А з фермы ідзе толькі сортам «экстра».
«Прыжыўся» тут яшчэ адзін тып робатаў — на падкормцы жывёлы грубымі кармамі. Ён кожныя дзве гадзіны аб’язджае кармавы стол і акуратна падсоўвае рэшткі раскіданага і недаедзенага фуражу.
Нельга не адзначыць і якасць кармоў: выдатны сілас з кукурузы, сянаж, нарыхтаваны ў плёнку, і ў дабавак — камбікорм.
На рабатызаванай ферме фарміруецца абсалютна новы статак з першацёлак. Гэта дадатковая нагрузка для работнікаў, так званых загоншчыкаў, якіх пакуль два ў змену (потым застанецца адзін). Цяпер даводзіцца прывучаць жывёлу да робатаў. Нягледзячы на гэта, надой ад каровы з пачатку года склаў па ферме 5174 кілаграмы.
Асаблівы клопат — пра жывёлаводаў. Да іх паслуг пакоі, дзе можна пераапрануцца, прыняць душ, ёсць пральная машына, сталоўка. У якой — халадзільнік, электрачайнік, СВЧ-печ, набор посуду. Словам, усё, каб прыгатаваць гарачы абед.
Калектыў фермы малады і... інтэрнацыянальны. Вікторыя Вартазаран, напрыклад, пераехала з бацькамі з Рыгі, працавала ў гандлі. А калі запусцілі ферму з робатамі, падалася сюды. Папярэдне прайшла вучобу на «Біякоме». Яна — аператар, адна сочыць за шасцю робатамі. Летам папоўніла сям’ю жывёлаводаў МТФ «Коўзаны» і маладая пара з Украіны — Віктар Іваноў і Вераніка Авільцава.
У калектыве ёсць яшчэ адзін перасяленец з Украіны — Артур Гарачоў. Прыехаў у «Навасёлкі-Лучай» з жонкай Ірынай, яе братам і маці. Жонка пакуль працуе ў падсобным цэху гаспадаркі, але як толькі пусцяць другую чаргу фермы, таксама з робатамі, пяройдзе туды.
На Віцебшчыне 9 ферм, дзе кароў дояць робаты. Надоі там большыя, чым на звычайных. Напрыклад, у ААТ «Хацілы» таго ж Пастаўскага раёна атрымліваюць 22 кілаграмы малака ад каровы ў суткі, у філіяле «Вясна-Энерга» Полацкага і філіяле «Каралі» Глыбоцкага — па 19—20 кілаграмаў.
Да канца года ў рэгіёне запусцяць яшчэ пяць ферм з робатамі — у Глыбоцкім, Аршанскім, Віцебскім і Верхнядзвінскім раёнах.
Дарэчы, Віцебшчына адной з першых у рэспубліцы пачала асвойваць робаты на малочна-таварных фермах. Гэта адбылося ў ААТ «Сакалоўшчына» Верхнядзвінскага раёна пяць гадоў таму.
Фота аўтара
