Футбольны транзіт: ужо дзясяткі балельшчыкаў праехалі праз тэрыторыю нашай краіны на ЧС-2018

Незвычайнага іншаземца сустрэлі гэтымі днямі бераставіцкія пагранічнікі. 70-гадовы аматар футбола з Германіі перасёк беларуска-польскую мяжу на трактары, абсталяваным «хаткай» у выглядзе бочкі. Пажылы мужчына недарма выехаў на ЧС па футболе так рана: транспартны сродак рухаецца з хуткасцю 30 км/г. З 4 чэрвеня праз пункты пропуску Беларусі перасеклі мяжу 19 грамадзян, якія маюць персаніфікаваную карту аматара футбола. 


Бязвізавы рэжым для транзіту па тэрыторыі нашай краіны для замежных балельшчыкаў на час ЧС па футболе ў Расіі пачаў дзейнічаць з 4 чэрвеня. У грандыёзным мерапрыемстве ўдзельнічае значная колькасць каманд з краін Еўрасаюза. Чакаецца, што больш за 150 тысяч аматараў футбола праедуць транзітам па тэрыторыі нашай краіны і назад: зразумела, многія захочуць заадно пазнаёміцца і з Беларуссю. 

— Каб перасекчы мяжу, іншаземцам трэба мець пры сабе пашпарт, а таксама персаніфікаваную карту гледача, ці, як кажуць у народзе, пашпарт балельшчыка, — паведамілі ў Гродзенскай пагранічнай групе. — Першыя балельшчыкі ўжо прайшлі праз нашы пункты пропуску. Бязвізавы рэжым на ўезд будзе дзейнічаць з 4 па 15 чэрвеня, на выезд — з 15 па 25 ліпеня — за 10 дзён да пачатку чэмпіянату і 10 дзён пасля яго заканчэння. 

Чэмпіянат свету па футболе ў Расіі стартуе 14 чэрвеня. Дакумент, які спрашчае перамяшчэнне іншаземцаў падчас турніраў, падпісалі кіраўнікі знешнепалітычных ведамстваў дзвюх краін. Ён дазваляе замежным балельшчыкам, па сутнасці, бесперашкодна ехаць і ляцець у Маскву праз нашу краіну.


— Мужчына з Германіі 1948 года нараджэння, які прыцягнуў увагу сваім трактарам Lanz Bulldog і домам на колах у выглядзе бочкі з надпісам Hallo Moskau! на прычэпе, прыбыў да нас каля васьмі вечара, і ўжо праз 50 хвілін яго фатаграфавалі на запраўцы за 500 метраў ад пункта пропуску, — паведамілі ў пагранічным пункце пропуску «Бераставіца». — Аматар прыбыў крыху раней тэрміну, з якога пачынае дзейнічаць пашпарт балельшчыка, але мы пайшлі яму насустрач. Узніклі невялікія цяжкасці з мытным афармленнем, бо транспартны сродак 1936 года выпуску адносіцца да сельскагаспадарчай тэхнікі. Але гэта пытанне ўрэгулявала мытня. Разам з пажылым немцам падарожнічае сабака. Цікава, што рускай мовы балельшчык зусім не ведае. Размаўлялі праз перакладчыка. 




Часам узнікаюць невялікія замінкі, калі іншаземец не мае пры сабе пашпарта балельшчыка. Тады ён падае электронны нумар, які мы ўносім у базу і атрымліваем адказ, што азначаны грамадзянін сапраўды ёсць у спісах. 

Чакаецца, што тысячы фанатаў спачатку паглядзяць нашу краіну, а потым праедуць у Расію. 

— На 8 чэрвеня ўжо 19 замежных грамадзян перасеклі мяжу праз пункты пропуску Беларусі, — адзначылі ў Дзяржпагранкамітэце. — Пакуль ніякіх праблем або затрымак не ўзнікала. Усе іншаземцы пры набыцці білетаў атрымліваюць вычарпальную інфармацыю. Асноўны паток балельшчыкаў чакаем праз тыдзень. 

kondratieva@sb.by