Сталіцай гэтага фестывалю Клайпеду зрабілі яе месца на Балтыцы і багатыя марскія традыцыі. У гэтым годзе марское свята прайшло тут ужо 60-ы раз. Гасцей юблейнага фестывалю чакалі кірмашы майстроў народнай творчасці, тэатральныя пастаноўкі, наведванне Літоўскага марскога музея і дэльфінарыя, велізарныя фуд-корты з разнастайнымі стравамі літоўскай нацыянальнай кухні, выступленні шматлікіх вулічных артыстаў у розных жанрах, спартыўныя спаборніцтвы, жывая экспазіцыя традыцыйных і гістарычных суднаў, якiя прышвартавалiся ля набярэжнай ракі Данге.
Адной з самых маляўнічых па-дзей свята стала ўрачыстае шэсце, у якім, па словах арганізатараў, прынялі ўдзел больш за 8 тысяч чалавек. Ансамбль народнай музыкі «Гудскi гармонік» быў удастоены гонару прадставіць нашу краіну ў гэтым шэсці. У яркіх нацыянальных касцюмах, з дзяржаўным флагам Беларусі, удзельнікі калектыву былі цёпла сустрэты вітальнымі воклічамі і апладысментамі на ўсёй дыстанцыі шэсця працягласцю 4 кіламетры.
Акрамя гэтага, ансамбль народнай музыкі «Гудскi гармонік» у якасці госця прыняў удзел у I Міжнародным фальклорным фестывалі «Масты мастацтваў». Канцэрт з удзелам харавых, танцавальных калектываў, сольных выканаўцаў з Украіны, Літвы і Беларусі адбыўся на адкрытай пляцоўцы каля помніка «Арка» ў гонар яднання Літвы. Ансамбль з Ліды падчас свайго выступлення прадставіў найбольш вядомыя беларускія народныя песні са свайго рэпертуару. Удзельнікі ансамбля таксама праявілі сябе ў новым фармаце вулічнага мастацтва, выступіўшы з канцэртнай праграмай у цэнтральным скверы на набярэжнай ракі Данге. Жадаючых паслухаць жывую беларускую музыку, станцаваць беларускую полечку сабралася дастаткова шмат. Пасля выступлення беларусаў многія падыходзілі са словамі падзякі за прыемныя ўражанні і пытаннем, дзе можна яшчэ раз іх паслухаць.
Дзмiтрый Пухнарэвiч
