Браканьераў затрымалі па гарачых слядах даішнікі.
Вадзім Лёвін, начальнік Мядзельскага ДАІ, маёр, Валерый Малько, капітан, Леанід Канопскі, прапаршчык, патрулявалі дарожную абстаноўку паблізу вёскі Маставікі Мядзельскага раёна. Недзе прыкладна ў 23.30 яны пачулі стрэлы...
Праз некалькі хвілін з боку вёскі Старыя Габы з’явіўся аўтамабіль “Аудзі-80”, які ўжо трапляў у поле зроку супрацоўнікаў ДАІ. Вадзіцеля спынілі для праверкі, але яўных доказаў, што страляў менавіта ён, не знайшлі.
Ахоўнікі парадку накіраваліся ў бок, адкуль пачулі выстралы. Па дарозе сустрэлі двух пешаходаў — мужчын з Мядзельскага і Вілейскага раёнаў. Папрасілі іх сесці ў службовы аўтамабіль для размовы. Ад затрыманых даносіўся пах свежаніны, і паводзілі сябе яны падазрона. Хутка мужчыны прызналіся, што незаконна застрэлілі кабана. Тушу амаль стокілаграмовай жывёліны і два ружжы схавалі ў лесе. Браканьеры паказалі месца схованкі. Хутчэй за ўсё супраць іх будзе ўзбуджана крымінальная справа.
Аляксандр СЯНЮЦЬ