Минск
+11 oC
USD: 2.04
EUR: 2.26

Рыцарский городок, исторические фотозоны и пятиметровый торт: мы узнали, как столица готовится ко Дню города

Мінск: падарожжа ў гісторыю

Кожны год у пачатку верасня Мінск, як па ўзмаху чароўнай палачкі, прыгажэе яшчэ больш. І нездарма, бо імяніннік павінен здзіўляць усіх сваім чароўным хараством. 952 — лічба салідная: за сваю амаль тысячагадовую гісторыю горад зведаў мноства змен, дзясяткі разоў перабудоўваўся. Сувязь часоў стане галоўным лейтматывам свята, якое пройдзе 14—15 верасня: на вуліцах сталіцы з’явяцца дзясяткі бігбордаў з выявай знакавых месцаў старажытнага Мінска і іх абноўленых «двайнікоў». Як яшчэ горад зменіцца да свайго дня нараджэння, даведалася карэспандэнт «Р».

Рабочыя ўжо пачалі ўпрыгожваць Мінск да свята.

Упрыгажэннем горада да ўсіх знакавых падзей традыцыйна займаецца прадпрыемства «Мінскрэклама». Вось і сёння, у цёплы жнівеньскі дзень, тут ніхто не адпачывае, бо запаветная дата блізка. Ужо праз два тыдні ўсе ўпрыгажэнні — вынік шматдзённай працы дызайнераў, інжынераў і рабочых — змогуць ацаніць мінчане і госці, якіх будзе нямала. Ці спадабаецца ім новая канцэпцыя афармлення Мінска? Сяргей Хільман, дырэктар прадпрыемства, лічыць, што ўсе «разыначкі» павінны быць з густам і абавязкова падыходзіць да архітэктуры горада:

— Да традыцыйных сіняга, белага і блакітнага колераў, якія будуць гарманіраваць з гербам Мінска, мы дадалі яркую кампазіцыю з рознакаляровага арнаменту. У гэтай стылістыцы цяпер рыхтуем вялікае 40-метровае пано, якое ўжо хутка з’явіцца на фасадзе педуніверсітэта. Складаецца яно, дарэчы, з 8000 квадрацікаў тканіны, і збіраюць яго ўручную — гэта вельмі карпатлівая праца.

Асаблівую ўвагу нададуць і Кастрычніцкай плошчы, дзе пад адкрытым небам у гэтым годзе ўпершыню пройдзе цырымонія «Мінчанін года». Не застануцца без увагі і галоўныя праспекты Мінска — Незалежнасці і Пераможцаў, а таксама тэрыторыя каля Палаца спорту.

Сяргей ХІЛЬМАН паказвае, як будзе выглядаць рыцарскі гарадок.

— У гэтым годзе мы натхняліся тэмай сувязі стагоддзяў, — далучаецца да гутаркі Дзмітрый Пракапенка, намеснік дырэктара па вытворчасці. — Пастараемся паказаць, што Мінск — старажытны горад з велізарнай гісторыяй і культурай, калісьці ён быў невялікім, але з часам разросся і шмат чаго змянілася. Таму мы і падрыхтавалі пару дзясяткаў білбордаў — гэтая серыя называецца «952 старонкі гісторыі любімага горада».

Атрымалася, трэба сказаць, вельмі атмасферна: разглядаючы архіўныя чорна-белыя здымкі, трапляеш у той час, калі Мінск не зіхацеў шматпавярховымі гандлёвымі цэнтрамі і зашклёнымі будынкамі. Вось па Саборнай плошчы едзе адзінокі коннік, а побач павольна шпацыруюць гараджане, а вось цячэ магутная Свіслач, уздоўж якой раскінуліся невысокія пабудовы...

— Працягам гістарычнай тэмы стане рыцарскі гарадок, які мы ўжо пачалі ўзводзіць непадалёк ад Палаца спорту — там пройдзе фестываль «Мінск старажытны», — кажа дырэктар. — Мы зрабілі не толькі эмблемы і плакаты, але і трыбуны для гледачоў, рысталішча, дзе будуць біцца рыцары, і стылізаваныя вежы па пяць метраў кожная.

На некаторыя дэталі атрымалася паглядзець і нам. На велізарных палотнах — выявы высакародных рыцараў у поўным абмундзіраванні. Здаецца, вось-вось яны сыдуць з малюнка, дастануць мячы і пачнуць біцца за даму сэрца. Эх, рамантыка...

Велізарны торт стане выдатнай фотазонай ля гарадской Ратушы

— Гарадок патрабуе ручной зборкі, — вяртае мяне «на зямлю» Дзмітрый, — усе дэталі трэба рабіць аб’ёмнымі і практычнымі, бо рыцары будуць вельмі самааддана махаць сваімі мячамі. Вядома, праца вядзецца пад кантролем членаў гістарычнага клуба, каб усё было дакладна. А то ведаеце, як у некаторых фільмах — паказваюць людзей з XII стагоддзя, а акцёры ходзяць у красоўках і носяць залатыя гадзіннікі. 

Дарэчы, разгледзець уборы мінчан, якія жылі тут у XII—XIX стагоддзях, таксама будзе магчыма: зараз дызайнеры прапрацоўваюць цікавыя фотазоны з выявамі дам і кавалераў тых часоў.

— Але, думаю, больш за ўсё лайкаў у Instagram збярэ пяціметровы торт, які мы размесцім каля гарадской Ратушы, — інтрыгуе Сяргей Хільман. — Не спяшайцеся аблізвацца: торт, на жаль, неядомы — вялікая канструкцыя з трыма святлодыёднымі свечкамі зроблена з металічнага каркаса з ашалёўкай. А ўпрыгожваць яе будуць здымкі краявідаў Мінска розных стагоддзяў. Весела будзе і ў Студэнцкай вёсцы — там гарвыканкам зробіць маладзёжнае свята, а афармленнем займаемся мы. А яшчэ павесім дэкарыраваныя банеры на кожнай уязной стэле.

Актыўна ўпрыгожваць горад да свята пачнуць у першыя дні верасня, а цалкам ацаніць новае ўбранне гараджане змогуць ужо 11 верасня.
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Фото: Владимир ШЛАПАК , Алексей МАТЮШ
1.73
Загрузка...