— Гэтая справаздача будзе выкарыстана як аснова пры распрацоўцы новай стратэгіі ўстойлівага развіцця да 2035 года. Усе заўвагі і прапановы будуць улічаны. Дарэчы, падчас эканамічнай секцыі Нацыянальнага форуму па ўстойлівым развіцці прыйшло больш за 20 прапаноў па пытаннях энергетыкі, развіцця прыватнага бізнесу. Усё гэта будзем акумуляваць і выкарыстоўваць пры абмеркаванні самой стратэгіі: праблемныя пытанні адпрацуем на экспертных рабочых групах, затым пройдзе серыя круглых сталоў сектаральных груп па асноўных кампанентах устойлівага развіцця, і завершыць гэтую працу кангрэс па ўстойлівым развіцці, на якім будзе прэзентавана НСУР-2035.
Яшчэ адно актуальнае пытанне тычыцца развіцця рэгіянальнай стратэгіі ўстойлівага развіцця рэгіёнаў. З такой прапановай выступіла Магілёўская вобласць. Да канца года плануецца падрыхтаваць метадычныя рэкамендацыі па распрацоўцы рэгіянальных стратэгій і ў наступным годзе на прыкладах адной з абласцей і некалькіх раёнаў стварыць пілотныя праекты абласной і раённых стратэгій. «Паглядзім, наколькі эфектыўна гэта атрымаецца, і далей пачнём працаваць ужо з усімі абласцямі», — рэзюміраваў Аляксандр Чарвякоў.
Прэзентуючы аналітычную справаздачу аб рэалізацыі ў 2016—2017 гадах НСУР-2030, дырэктар НДЭІ Мінэканомікі Віктар Пінігін акцэнтаваў увагу на чатырох мэтах, якія былі пастаўлены пры яе распрацоўцы. Па-першае, правесці маніторынг паказчыкаў, якія характарызуюць дынаміку па ключавых індыкатарах у НСУР-2030. Па-другое, ацаніць актуальнасць палажэнняў і індыкатараў НСУР-2030 з пазіцыі сённяшняга дня і тых змен, якія адбыліся ў сацыяльнай сферы, эканоміцы і экалогіі. Па-трэцяе, ацаніць адпаведнасць мэт і задач НСУР-2030, якая была прынята ў пачатку 2015 года, глабальным мэтам устойлівага развіцця дэкларацыі ААН, прынятай у тым жа годзе, але крыху пазней. Чацвёртая мэта — выпрацаваць рэкамендацыі па структуры і напаўненні новай Нацыянальнай стратэгіі ўстойлівага развіцця да 2035 года.
— Мы адзначаем, што ў цэлым у 2016—2017 гадах меліся станоўчыя змены складальнікаў рэалізацыі НСУР-2030. Пазітыўны рух у сферы ўстойлівага развіцця мы назіралі, нягледзячы на тое, што 2016—2017 гады былі даволі няпростымі ў эканамічным плане. Большасць палажэнняў стратэгіі застаюцца актуальнымі і для НСУР-2035.
У сваю чаргу, выканаўчы дырэктар зямельнага аб’яднання «Павестка 21» зямлі Паўночны Рэйн-Вестфалія (Германія) Клаус Ройтэр адзначыў сур’ёзныя змяненні ў частцы ўстойлівага развіцця, якія адбыліся ў Беларусі за апошнія 10 гадоў. У нашай краіны, звяртае ўвагу міжнародны эксперт, сур’ёзныя амбіцыі і мэты, якія базіруюцца на трох кітах — эканоміцы, сацыяльным развіцці і экалогіі. У той жа час паміж асобнымі міністэрствамі і ведамствамі часам захоўваецца канфлікт інтарэсаў, што тычыцца прыярытэтаў тых ці іншых мэт. Акрамя таго, беларускім экспертам варта было б сфакусіравацца на тэрытарыяльнай прывязцы мэт устойлівага развіцця і выбудаваць «дарожную карту» іх рэалізацыі.
