Жадаючых набыць кватэру ў новабудоўлі менш не стала, але новыя цэны зрабілі такі варыянт некаторым не па зубахКіраўнік «Твая сталіца — Навабудцэнтр» Наталля Жалава спяшаецца запэўніць: ахвотнікаў набыць кватэру ў новабудоўлі менш не стала. Але цэны, якія за год падняліся, зрабілі такі варыянт некаторым не па зубах. А пачыналася ўсё з больш танных у апошні год крэдытаў. Многія вырашылі ўзяць у банкаў у доўг частку сумы і ўкласціся не ў старыя кватэры, а ў новыя. Ды так актыўна, што нават сезонны фактар адпаў. Зразумелая справа, з-за ажыятажу пайшлі ўверх і цэны. Прычым больш за ўсё яны падскочылі ў эканом-сегменце — у сярэднім на 17 працэнтаў. Вось і выходзіць, што сярэдняя аднапакаёўка ў параўнанні з летам мінулага года стала даражэй на пяць тысяч долараў у эквіваленце. Двухпакаёўка — на 9 тысяч долараў, трохпакаёўка — амаль на 15 тысяч. Пагадзіцеся, розніца адчувальная.
Зараз пакупнікі ўсё яшчэ актыўна звяртаюцца да крэдытаў. Пры гэтым не менш за 70 працэнтаў кліентаў, дзеліцца назіраннямі Наталля Жалава, па розных прычынах разлічваюць толькі на ўласныя сілы. З-за новых цэн людзям неабходна больш часу, каб назбіраць патрэбную суму.
— Нехта прынцыпова не хоча пазычаць у банка, а хтосьці і не можа — не адпавядае ўзровень даходу, асабліва пасля ўвядзення каэфіцыента пазыковай нагрузкі. Або проста няма паручыцеляў. Ды і ў выпадку з новабудоўляй, калі ўзяць крэдыт на мяжы сваіх фінансавых магчымасцей, за што потым рабіць рамонт? — тлумачыць эксперт. — Наглядны прыклад: яшчэ год таму для пакупкі аднапакаёвай кварэры плошчай крыху больш за 40 «квадратаў» маладая сям’я, выкарыстоўваючы ўсе магчымыя крыніцы, за некалькі гадоў збірала суму каля 45 тысяч долараў у эквіваленце. А цяпер тая ж аднапакаёўка ўжо каштуе 50 тысяч. А значыць, набыццё яе будзе адкладзена яшчэ на некалькі гадоў.
Якія могуць быць варыянты? Напрыклад, прыгледзецца да дамоў на пачатковай стадыі будаўніцтва. Як правіла, цэннікі ў іх ніжэй, чым у практычна гатовых. Ды яшчэ і перыядычна сустракаюцца выгадныя прапановы растэрміноўкі аплаты. Яшчэ з плюсаў — большы выбар планiровак і паверхаў. Праўда, такі расклад падыдзе тым, каму ёсць дзе жыць год-паўтара, пакуль дом здадуць. Зрэшты, некаторыя пакупнікі могуць запярэчыць: ёсць рызыка нарвацца на даўгабуд. Эксперт парыруе:
— Ускладнены ў свой час механізм атрымання зямельных участкаў і больш жорсткія патрабаванні да забудоўшчыкаў адсеялі слабыя і нядобрасумленныя кампаніі. Даўгабуды былі вынікам працы тых забудоўшчыкаў, хто выходзіў на рынак толькі з адным домам і без вопыту работы. Забудоўшчыкі, якiя працуюць зараз на рынку, клапоцяцца аб сваёй рэпутацыi, бо разлiчваюць сваю дзейнасць з перспектывай на гады наперад. Больш за тое, цяпер некаторыя забудоўшчыкі завяршаюць будаўніцтва нават раней заяўленага тэрміну.
З прыходам восені, на думку Наталлі Жалавай, сур’ёзнага ўсплёску пакупніцкай актыўнасці чакаць не даводзіцца. А значыць, паўплываць на цэны ў большы бок попыт не зможа. Зрэшты, прыкметнага падзення таксама не чакаецца.
Паводле ацэнак партала аб нерухомасці realt.by, на гатовыя новабудоўлі прыходзіцца ўсяго 10 працэнтаў здзелак. За апошнія паўгода, кажуць, гэта самы нязначны паказчык. Прычына ў тым, што ў гэтым сегменце цяпер пераважаюць праекты ў пачатковай стадыі будаўніцтва. У цэлым, адзначаюць эксперты партала, рэкордны попыт на кватэры ў Мінску застаўся ў мінулым — з кожным месяцам падае колькасць здзелак. Пачынаючы з мая, яна штомесяц скарачаецца ў сярэднім на 10 працэнтаў. У ліпені не набралася нават тысячы здзелак. Апошні раз такое было аж 17 месяцаў таму. Што яшчэ характэрна: разрыў паміж сярэднім узроўнем цэн прапановы і рэальных здзелак па-ранейшаму невялікі і складае 1,7 працэнта.
Дарэчы, і пакупнікі, і прадаўцы ўважліва сочаць за курсам долара — у апошні час ён падскочыў. Калі ў бліжэйшы час не адбудзецца адхілу назад, цэны ва ўмоўных адзінках прыйдзецца карэкцiраваць у меншы бок.
