Мала па малпу

Ігуаны, тыгровыя пітоны, павукі-птушкаеды – навошта мінчане ўсё часцей селяць у сваіх кватэрах экзатычных гадаванцаў

Сабакамі, катамі, трусамі, акварыумнымі рыбкамі і папугаямі сёння ўжо нікога не здзівіш. Зусім іншая справа — малпы, лоры, яноты і пітоны. Рэдкі выпадак, калі квадратныя метры ў кватэры з чалавекам падзяляе павук-птушкаед ці чылійская вавёрка. Карэспандэнт “Р” высветліла, чаму нашыя суайчыннiкi прыручаюць экзотаў, колькі каштуюць такія жывёліны і ці трэба іх рэгістраваць.

Птушкаед па ўмаўчанні лічыцца хлопчыкам

Ілля РУДЗЬКО: «Птушкаеда трымаць у хаце няцяжка».
Асноўнымі крытэрыямі ў выбары хатняга гадаванца для маладога спецыяліста Іллі Рудзько сталі яго памеры і характар. Жыве хлопец у інтэрнаце, а там не надта шмат вольнага месца. Павук-птушкаед падаўся найменш патрабавальным. Ды і карміць яго трэба ўсяго два разы на тыдзень.

Набыў Ілля павука ў мінскага разводчыка разам з першасным наборам — кантэйнерам з какосавым субстратам і кормам. Аддаў за ўсё каля 17 рублёў. 

— Мой птушкаед яшчэ зусім малады, і пол вызначыць пакуль не атрымалася. Таму ён па ўмаўчанні лічыцца хлопчыкам. Назваў Рубэнам, а ў жаночай інтэрпрэтацыі — Рубі. Павучок рухавы, хуткі і зусім не агрэсіўны, — апісвае хлопец рысы характару свайго ўлюбёнца. — Аднак адна спроба збегчы ў яго была. Для добрага настрою і самаадчування Рубэну неабходны пастаянная тэмпература каля +28 °С, кантроль вільготнасці і добрая вентыляцыя. 

Хлопец упэўнены: лепш утрымацца ад спакусы ўзяць павука ў рукі. Калі ён адчуе небяспеку, то скарыстае ўсе сродкі абароны: ад пякучых валаскоў да іклаў. Птушкаеды любяць паласавацца прусакамі, цвыркунамі і апарышамі. Дарослыя павукі не адмаўляюцца ад мышэй ці жаб.

Маленькія малпы ў кватэрах — з’ява рэдкая, але іх колькасць расце.
А вось Алена Беляковіч можа пахваліцца цэлай хатняй калекцыяй экзатычных гадаванцаў. У кватэры дзяўчыны пасяліліся афрыканскія вожыкі, тыгравыя пітоны, паўднёваамерыканская ігуана, а таксама зялёная малпачка-вярветка. 

— Развядзеннем афрыканскіх вожыкаў пачала займацца паўгода таму, калі набыла жывёлін за мяжой. Каб даглядаць такога гадаванца, дакументы не патрэбныя. Калі справа ідзе пра развядзенне, неабходны пашпарт і звесткі пра прышчэпкі, — дзеліцца Алена гісторыяй хатняга заапарка. — Попыт на афрыканскіх вожыкаў расце з кожным днём, таму што каштуюць яны танна і догляд не патрабуе асаб-лівых намаганняў. 

На розных заасайтах кошт на афрыканскіх вожыкаў вар’іруецца ад 100 да 150 рублёў у залежнасці ад полу, узросту і колеру. Алена прадае экзотаў па зніжцы — ад 80 да 100 рублёў.

Куплю экзота. Танна

Ігуана не вельмі танная жывёла — каштуе каля 300 рублёў.
Набыць хатніх экзотаў можна не толькі на рынках і з рук праз спецыялізаваныя інтэрнэт-сайты і групы ў сацсетках. Падрабязныя прайс-лісты знаходзім на старонках заапаркаў. Асартымент Гродзенскага заапарка не надта вялікі. Тут з лёгкасцю рэалізуюцца папугаі ад 20 да 40 рублёў, трусы па 18 рублёў і грызуны ад 5 да 8 рублёў. На гэтым экзотыка заканчваецца.

Мінскі заапарк прапануе наведвальнікам нашмат большы асартымент жывёл для продажу. Акрамя класічных грызуноў, чарапах і рыбак, знаходзім імператарскіх удаваў па 300 рублёў, каралеўскіх пітонаў па 200 рублёў і ігуан па 300 рублёў. 

Канешне, інтэрнэт прапануе аматарам экзатычных жывёлін нашмат большы выбар. Як кажуць, на розны густ і колер. Тут мы натрапілі на разводчыкаў сцяпных гадзюк, барадатых агамаў, бананаедаў і паўлінаў. Птушкаеды на прасторах інтэрнэту каштуюць каля 100 рублёў, тхары — каля 140, хамелеоны — 300. Яноты — набытак не з танных: каля 850 рублёў.


Сеткаваты пітон.
На дзіва, у інтэрнэт-прасторы сустракаюцца аб’явы з лісамі. Кошт за адну — каля 600 рублёў. Тут узнікае пытанне: ці ўсіх жывёл можна трымаць у хатніх умовах? Звяртаемся ў ЖРЭУ, дзе адразу спасылаюцца на Правілы ўтрымання хатніх сабак, катоў, а таксама адлову безнаглядных жывёл у населеных пунктах. У дакуменце прапісана, што рэгістрацыі належаць толькі каты і сабакі. З гэтага робім выснову: астатніх рэгістраваць не трэба. Аднак як жа дагэтуль не прыняты Закон аб абыходжанні з жывёламі, у якім будуць артыкулы пра грызуноў, акварыумных рыбак, малюскаў, птушак, земнаводных і паўзуноў? 

Нямала намаганняў прыходзіцца прыкласці тым, хто хоча набыць жывёліну з Чырвонай кнігі ці тыя віды жывёл і раслін, што падпадаюць пад дзеянне Канвенцыі па міжнародным гандлі відамі дзікай фаўны і флоры, што знаходзяцца пад пагрозай знікнення. Ім неабходна атрымаць дазвол Міністэрства прыродных рэсурсаў і аховы навакольнага асяроддзя. 

Завезці экзота ў нашу краіну — справа не з простых. На мяжы трэба прадставіць ветэрынарны сертыфікат з Дзяржветнагляду і даведку з неабходнымі прышчэпкамі. Аднак варта прайсці праз гэтыя выпрабаванні, каб пасяліцца побач з нетыповай для нашай мясцовасці жывёлінай. А разам з тым атрымаць порцыю штогадовай экзатычнай асалоды.

veronika.ulasevich@mail.ru

Фота з архіва герояў

Заметили ошибку? Пожалуйста, выделите её и нажмите Ctrl+Enter
Версия для печати
Заполните форму или Авторизуйтесь
 
*
 
 
 
*
 
Написать сообщение …Загрузить файлы?
Новости
Все новости