Словазлучэнне “вялікі польскі паэт” стала пэўнага кшталту “шлейфам” Міцкевіча, творамі якога зачытваюцца ва ўсім свеце вось ужо амаль два стагоддзі. Але яшчэ не ўсюды вядома, што літаратурны класік паходзіць з Беларусі. Давесці гэта на словах цяжка. А паказаць, у якіх кутках нашай краіны пакінуў свой след (у літаральным сэнсе!) пісьменнік, здолеў усё той жа Ліхадзедаў. Нездарма ж Уладзімір Аляксеевіч збіраў паштоўкі, звязаныя з месцам нараджэння Міцкевіча, яго навучання, творчасці. Па іх, як па карце, лёгка прасачыць, як дарога генія пачыналася пад Навагрудкам, а завяршылася... у Стамбуле.
Рэдкія паштоўкі Уладзімір Ліхадзедаў, лаўрэат прэміі “За духоўнае адраджэнне”, прэзентаваў на выставе ў Беларускім дзяржаўным музеі гісторыі Вялікай Айчыннай вайны. Мабыць, ацалелі рарытэты збольшага ў прыватным зборы мінскага калекцыянера. Цяпер жа даступныя ўсім — у экспазіцыі і апублікаваныя ў шыкоўным альбоме.
Углядаешся ў краявіды, адлюстраваныя на паштоўках, чытаеш подпісы пад імі — і адкрываеш невядомыя далягляды: вось месца, дзе нарадзіўся Міцкевіч (хутар Завоссе пад Навагрудкам, дзесяць год таму адноўлены і прыстасаваны пад мемарыяльны музей), тут хрысціўся, вучыўся (Навагрудак), а вось — Туганавічы, дзе жыла каханая паэта — вечная муза Марыля Верашчака. Або возера Свіцязь. Ёсць на яго берагах выдатны дом адпачынку. Але не столькі рэкрэацыйным і прыродным патэнцыялам славіцца вадаём. Уздоўж яго некалі прагульваўся наш Адам, тут “жывуць” героі многіх яго паэм...
Лёс спрыяў Міцкевічу. Яго чыталі, шанавалі, ім захапляліся. Сам Пушкін ганарыўся дружбай з нашым земляком. Аднак на радзіме Адаму давялося пажыць мала. А радзіма была даволі вялікая. Я лічу паэта беларусам, але сам ён мог сябе называць і інакш — палякам, ліцвінам. У Вільні, Каўнасе, Паланзе яго прымалі за свайго. Два стагоддзі таму лічылася, што Беларусь — гэта краіна на ўсход ад Мінска, а Навагрудак і ўсё, што на поўнач, да самай Балтыкі, — Літва. Такая вось гісторыя з геаграфіяй — напамін пра тое, што калісьці на акрэсленых абшарах існавала Вялікае княства Літоўскае. Ведаючы пра гэта, вы не здзівіцеся, прачытаўшы на адной з паштовак, прысвечаных Міцкевічу: “Нарадзіўся 24 снежня 1798 года ў Завоссі пад Навагрудкам, у Літве”.
З тае Літвы Міцкевіч перабраўся ў Маскву, а потым знайшоў прытулак у Санкт-Пецярбургу. Наўрад ці нехта, апрача вучоных, сёння згадае, што менавіта ў расійскіх сталіцах да нашага паэта прыйшла міжнародная слава. У Расіі яго ўпершыню сталі шмат перакладаць, а рускія інтэлектуалы, нягледзячы на вечныя спрэчкі з палякамі, прынялі “чужаземца” са шчырай славянскай гасціннасцю. Аднак, бываючы ў Маскве, вы не знойдзеце ўказальнікаў да месцаў, дзе жыў, працаваў наш зямляк. Хаця такіх месцаў нямала — ад вуліцы Цвярской да Патрыярхавых ставоў.
Няма ў Маскве і помніка Міцкевічу. На жаль... На старых паштоўках між тым адлюстраваны манументы ў гонар паэта ў такіх мясцінах, дзе, здаецца, той ніколі сам не бываў. Хаця дзе толькі не жыў Адам — і ў швейцарскай Лазане, і ў Парыжы. Там выкладаў літаратуру, тужыў па радзіме і пісаў, пісаў, пісаў... Прыхільнікі тым часам друкавалі паштоўкі. На іх — курган Міцкевіча ў Навагрудку, даліна Міцкевіча ў Каўнасе, дом у Веймары, у якім паэт сустракаўся з Гётэ, помнік у Карлсбадзе, цяперашніх Карлавых Варах...
Асобная гісторыя — манументы ва Украіне. Тут Міцкевіч не жыў, не тварыў (не лічачы Крыма), але адзін з першых помнікаў паэту з’явіўся ў Львове — калона ў старажытнарымскім стылі з фігурай Адама ля п’едэстала. Паштоўка з выявай манумента расказвае, што яго стваралі пры ўдзеле Уладзіслава — сына класіка, тады ўжо бясспрэчнай зоркі сусветнай літаратуры.
А ці чулі вы такія ўкраінскія назвы — Рава-Руская, Перамышляны, Самбар, Стрый, Церабоўля, Таўмач? Ну пра Трускавец, Івана-Франкоўск (колішні Станіславаў), Цярнопаль пэўна ж ведаеце. Дык вось, у кожным з гэтых паселішчаў на пачатку ХХ стагоддзя былі (а недзе, мабыць, і засталіся) помнікі, вуліцы, алеі, названыя ў гонар польскага пісьменніка, народжанага ў Беларусі. Зрэшты, хто пасля гэтага скажа, што Адам — толькі наш або польскі? Ён — міжнародны паэт!
Аднак у Мінску бронзавая фігура Міцкевіча з’явілася толькі ў 2003 годзе. Са спазненнем, але, як кажуць, лепш позна... Таму Мінска на старых паштоўках, прысвечаных паэту, няма. Затое няма і такой карткі, якая з’явілася ў Польшчы ў гады Другой сусветнай вайны: нямецкія захопнікі знішчаюць помнік паэту ў Кракаве. Бронзавы Міцкевіч на вачах збянтэжанай публікі валіцца галавою ўніз, на брук... За што? За тое, што сябраваў з Гётэ?..
Разглядаючы старыя фотаздымкі, ёсць над чым паразважаць. Збор паштовых картак з відамі многіх краін, з’яднаных беларускім прозвішчам Міцкевіч, хочаш не хочаш, наводзіць яшчэ на адну думку. Узяць бы такую калекцыю ды выправіцца ў вандроўку па дарогах жыцця класіка. Чаму не! Мо ідэю возьмуць на ўвагу прадстаўнікі турыстычных фірм, і мроя стане рэчаіснасцю?
Міжнародны паэт
Падарожжа па дарогах жыцця Адама МіцкевічаШто аб’ядноўвае Навагрудак, Вільню, Маскву, Санкт-Пецярбург і Стамбул? Можна правесці мноства гістарычных паралеляў паміж гэтымі гарадамі, прасачыць іх сённяшнія эканамічныя і культурныя сувязі. Але дакладнага адказу з ходу не даў бы нават наш славуты ўсявед Алесь Мухін. У “Што? Дзе? Калі” выйграў бы адназначна тэлеглядач. А аўтарам каверзнага пытання аказаўся б мінчанін Уладзімір Ліхадзедаў. Ён злучыў пералічаныя гарады ў адзін ланцуг моцным звяном. Гэтае звяно — Адам Міцкевіч.