Свет убачыла выданне, якое робіць шмат адкрыццяў перыяду ВКЛ
Значная падзея ў кнігавыдавецтве і гісторыі нашай краіны. У свет выйшла кніга “Міндаў, кароль Літовіі, у дакументах і сведчаннях”, складальнікам і перакладчыкам якой з’яўляецца філолаг Алесь Жлутка.
Міндаў – асоба для беларусаў знаёмая. Звесткі пра першага валадара Вялікага княства Літоўскага ёсць нават у школьных падручніках. Але яго дзейнасць да канца яшчэ не вывучана. Алесь Жлутка ўзяўся за складаную працу. Але, як ён прызнаўся, пасля таго як пабываў у Ватыканскім таемным архіве, проста захварэў Міндавам. Да 750-годдзя яго каранацыі вырашыў надрукаваць невялікую брашуру. З такой прапановай і звярнуўся ў выдавецтва “Тэхналогія”. Да свята зрабіць кнігу не паспелі. Аднак Алесь Жлутка не расстройваецца, наадварот. За два гады ён назбіраў шмат матэрыялу, з якога атрымалася кніга ў 235 старонак.
Тэксты друкуюцца з арыгіналаў або ўзнаўляюцца на падставе больш дакладных копій з даданнем розначытанняў. Першая яе частка – дакументы, сабраныя ў ар-
хівах Рыгі, Берліна і Ватыкана. Другая і трэцяя – сведчанні людзей, якія ведалі Міндава. Апошняя – каментарый. Па меркаваннi прафесара, доктара гістарычных навук Георгія Галенчанкі, кніга выклікае нямала спрэчак сярод навукоўцаў. Па-першае, у ёй шмат невядомых дакументаў, па-другое – адмысловы каментарый.
На думку галоўнага рэдактара выдавецтва “Тэхналогія” Зміцера Санько, дакументы, знойдзеныя Жлуткам, пацвярджаюць шмат момантаў, якія да гэтага часу былі толькі меркаваннямі. Адзін з якіх – каранацыя Міндава адбывалася ў межах сённяшняй тэрыторыі Беларусі. Цікава таксама, што імя Міндава і яго сыноў – славянскага паходжання. Па словах складальніка, гэта кніга – не апошняя кропка ў даследаванні лацінамоўнай спадчыны. Яго работа толькі кропля з таго, што можна зрабіць у вывучэнні гісторыі нашай краіны па архівах, якія знаходзяцца ў розных краінах Еўропы. Зазірнуўшы туды, можна напісаць яшчэ не адну падобную кнігу.
