Колькi ботаў было ў сярэднестатыстычнага пiнскага шляхцюка i хто такая фюрданцэрка?
Напачатку кароткi напамiнак тым, хто забыўся альбо ўвогуле не чытаў папярэдняга нумара «Рэспублiкi»: другога чэрвеня экспедыцыя выйшла з Пiнска i пайшла па Прыпяцi да гiдравузла «Стахава» Столiнскага раёна, а па дарозе бачыла многа чаго цiкавага, аб чым я i абяцаў расказаць. Паколькi слова, як людзi кажуць, не верабей, то яго i стрымлiваю.
Ледзьве яхта выйшла за межы Пiнска i крыху ўлеглася перадстартавая лiхаманка, як я стаў наўмысна часта паглядаць у бок начальнiка Пiнскай гаррайiнспекцыi прыродных рэсурсаў i аховы навакольнага асяроддзя Аляксандра Гарошкi. I вось чаму. Яшчэ напярэдаднi падзеi, калi мы дамовiлiся з Мiнiстэрствам прыродных рэсурсаў i аховы навакольнага асяроддзя наконт самага цеснага супрацоўнiцтва ў час экспедыцыi, я патэлефанаваў у Пiнск, каб загадзя ўдакладнiць адрасы будучых публiкацый, вызначыцца з людзьмi, якiя з поўным веданнем справы ўсё нам пакажуць i пра ўсё раскажуць. Аляксандр Васiльевiч цвёрда, як зараз кажуць, заверыў, што пазнаёмiць нас з такiм чалавекам, слухаць якога мы будзем, забыўшыся на ўсё астатняе. Таму, вытрымаўшы класiчную тэатральную паўзу, Аляксандр Гарошка знаёмiць нас з вядучым спецыялiстам ландшафтнага заказнiка рэспублiканскага значэння «Сярэдняя Прыпяць» i «Простыр» Русланам Падвiцельскiм.
З iм мы дамовiлiся, што размова аб заказнiках, шматлiкiх яго насельнiках, у лiку якiх i белахвосты арлан, за магчымасць убачыць якога еўрапейскiя арнiтолагi прадалi б душу д’яблу, стане тэмай асобнай публiкацыi, а таму пачну адразу з Кудрыч Пiнскага раёна.
Ехаць сюды ад гiдравузла «Качанавiчы» па добрай гравiйцы ўсяго нiчога. Прыехалi, вылезлi, пайшлi ўслед за Русланам па вузкай сцежцы, з яе звярнулi — i бачым хлеў на сялянскай сядзiбе. Звычайны, на першы погляд. Толькi вось страха на iм — з трыснягу i, бачна, не адзiн десятак год таму зроблена. Пад шырокiм застрэшкам — немудрагелiстыя прылады сялянскай працы. Бачу iх першы раз, але такое пачуцце, што некаторыя з iх — рэзгiны, сахары, граблi, што без аднаго цвiка зроблены, гачкi, бiлы i iншае добра знаёмыя. Даходзiць нарэшце: «Людзi на балоце» Iвана Мележа, дзе сялянскi побыт тагачаснага Палесся апiсаны вобразна i ярка.
— Тамтэйшыя насельнiкi i сапраўды людзi на балоце. Вёска стаiць на некалькiх мiнеральных астравах, вакол якiх спрэс балацянкi, — тлумачыць Руслан Падвiцельскi. — Дарога да вёскi працягнута толькi ў сярэдзiне дзевяностых, раней карысталiся выключна лодкамi. На iх вазiлi рыбу на кiрмаш у Пiнск, тралявалi гной i сена, праводзiлi да свайго апошняга прытулку нябожчыкаў. Лодкi былi яшчэ тыя — дзве каровы i конь змяшчалiся хоць бы што.
На сядзiбу старасты вёскi Майсея Махнаўца Руслан вядзе нас на правах добрага знаёмага гаспадара i паказвае ўсю палескую экзотыку, зробленую яшчэ рукамi дзядоў i прадзедаў сённяшнiх яе жыхароў. На гэты момант iх засталося ўсяго 28 чалавек, буслоў у гэтай цiхай мясцiне ў мiжрэччы Ясельды i Пiны даўно болей, чым людзей. Падалося, што паспрыяла гэтаму (у дадатак да натуральных працэсаў старэння i iншага) i такое вось балотнае iснаванне, якое вымагае ад чалавека куды больш высiлкаў, чым пры нармальным сялянскiм жыццi.
Яўстафiй Муга, якога мы стрэлi ля веснiц даволi дыхтоўнай сядзiбы, гэтыя мае меркаваннi пацвердзiў адразу.
— Жыцця добрага для сябе не бачыў, хлопчыкi, усё яно ў гэтай багне патанула, — адразу паскардзiўся ён нам.
Першае сумненне ў тым, што так яно i ёсць на самай справе, узнiкла, варта было пяглядзець на самога гаспадара. Чамусьцi анiяк ён не паходзiў на мележаўскага Васiля Дзятлiка ў пенсiённым узросце, змарнелага i нехлямяжага, — стаяў перад намi той яшчэ мацак, жвавы i з хiтрынкай у вачах, якому ягоныя 64 гады нiколi не дасi. Размаўляем далей. Кажу яму, што, вiдаць, нiчога на гэтых балотах не расце, а ён мне: «Бульба тут добрая родзiць, лён, каноплi, збожжа таксама — дай ты рады». Даводжу, што цяжка гэта, на лодках усё вазiць, а ён мне: «А што тут цяжкага? Кульнуў воз гною ў лодку, каня загнаў i паплыў памаленьку». — «Дзе ж вы, — пытаюся, — той гной бераце, калi жывёлу пасвiць няма дзе?» А ён мне: «Зямлi тут заўсёды было больш, чым у другiх вёсках, сена мы ў калгас прадавалi, а птушак, качак, гусей, па дзвесце штук трымаў». — «Чаму, — кажу, — вы тут усё жыццё седзiце, на сушэйшае месца не перабралiся?» Ён мне: «А навошта? Тут спрадвеку жывём i жыць будзем». — «Жыццё, — пытаюся, — вiдаць, тут нядоўгае? Усё ж твань, сыра, холадна». А ён мне ў адказ пальцы загiнае: «Дзед мой пражыў 88 гадоў, мама — 87, суседцы Зiне не намнога менш, аслепла, па сядзiбе па вяровачках, што чалавек яе панацягваў па ўсiх сцежках, сноўдаецца, але ж памiраць не збiраецца, а я таксама. Адно шкада, — кажа напрыканцы размовы, — што грошы, заробленыя, калi Саюз ляснуўся, таксама ўсе ляснулi — цэлых, халера на iх, сто тысяч».
Вось табе, як той казаў, i маеш, вось i кладзi ты палец хiтраму палешуку ў рот. Тым больш высветлiлася з дапамогай Руслана Падвiцельскага, што першае ўпамiнанне аб Кудрычах датавана 1552 годам, былi яны тады ўласнасцю ордэна францысканцаў. Пяць вякоў, выходзiць, прастаялi i яшчэ, калi меркаваць па тым, што прыязджаюць сюды ўнукi на лета, стаяць у дварах iншамаркi, прастаяць. Можа, i таму, што насельнiкi не змагалiся з прыродай, а навучылiся суiснаваць з ёю, бачыць выгоду i добрае далёка. Прыйшла вада на падворак — паставiм загародкi, вада сыдзе — рыба застанецца. Сенажацi затапiла — трава лепшая будзе, больш збожжа калгас дасць за сена.
Канешне, жыццё гэта я не iдэалiзую, лубок не раблю, пацёмкiнскую вёску не ствараю. Сялянскае жыццё спрадвеку было цяжкiм, i сёння яго лёгкiм не назавеш. У Кудрычах яно, па вялiкiм рахунку, такое, як усюды, з папраўкай на палескую спецыфiку. Ёсць тут i валацугi, ёсць i сапраўдныя руплiўцы, у кагосьцi цалкам хапае грошай разлiчыцца за мабiльную сувязь, а камусьцi на ранiшнюю i абавязковую бутэльку «чарнiла» не хапае.
Жыць альбо iснаваць тут, як i паўсюдна, кожны выбiрае сам. Хоча, напрыклад, Майсей Махнавец, каб мёд у яго на стале не пераводзiўся, каб была ад яго капейчына добрая да пенсii — завiхаецца ля агромнiстых калод з пчоламi. Менавiта калод, ды такiх, што i двум чалавекам не абхапiць. А гаспадар iх яшчэ i на лугi вывозiць. Руслан Падвiцельскi з гэтай нагоды сказаў, што, калi ўбачыў гэты працэс першы раз, зразумеў, як будавалiся егiпецкiя пiрамiды. Трэба гэта ўсё Майсею, трэба васьмiдзесяцiгадовай Ганне Рабец, вакол сядзiбы якой ярка i густа цвiтуць вяргiнi, а нейкаму спрэс прапiтаму чалавеку, якога мы падвезлi да магазiна, не трэба, i нiчога з гэтым не зробiш.
На гэтым бы ўсё, ды трэба яшчэ пра шляхцюковыя боты пару слоў. Едуць, значыць, сын i бацька на возе з сенам i звешваюць з яго кожны па адной назе ў блiскучым чорным боце. Другую кожны хавае ў сена, бо яна... босая. Вядома, што такiя, з дазволу панства, багацеi, можа, i маглi спынiцца ў пiнскiм гатэлi таго часу, а вось заплацiць за вiзiт дзяўчыны далёка не самых строгiх правiлаў — фюрданцэркi — наўрад цi... (у мiнулым нумары «Р» гэтыя словы я напiсаў крышку на рускай мове, даруйце!).
На здымку: Аляксандр ГАРОШКА.