Гэты тыдзень у Лельчыцкiм раёне пройдзе пад знакам аховы i беражлiвых адносiн да найкаштоўнейшага нацыянальнага багацця краiны – лесу.
— Сумесна з раённым выканаўчым камiтэтам у рамках рэспублiканскай акцыi «Тыдзень лесу — 2008» распрацавалi мерапрыемствы, накiраваныя як на прыцягненне ўвагi насельнiцтва раёна да тэмы ашчадных адносiн да лясных насаджэнняў, так i на далучэнне гарадскiх i сельскiх жыхароў да справы памнажэння лясных фондаў, — адзначае намеснiк дырэктара ГЛХУ «Лельчыцкi лясгас» Марыя Аскерка. – З удзелам мясцовага насельнiцтва, членаў 10 школьных ляснiцтваў, прадстаўнiкоў органаў улады, грамадскiх арганiзацый, школьнiкаў i студэнтаў з 7-га па 12 красавiка плануецца высадзiць каля 142 тысяч сеянцаў сасны i бярозы на плошчы каля 22 гектараў.
Работнiкi лесу ўпэўненыя: задуманае ўдасца паспяхова ажыццявiць. Тым больш што вопыт сумеснай працы на карысць зялёнага сябра ў iх маецца. Так, у мiнулым годзе падчас правядзення працоўнай акцыi «Дзень лесу» на тэрыторыi лясгаса добраахвотнiкамi i лесаводамi было пасаджана 68 тысяч саджанцаў дрэў. А ўвосень члены працоўных калектываў раёна, школьнiкi i моладзь ачысцiлi ад смецця больш як 1500 гектараў лесу, лiквiдавалi каля тысячы стыхiйных звалак.
Як паведамiлi ў лясгасе, лесааднаўленчыя работы будуць праводзiцца на ўчастках, што выйшлi з парубак галоўнага карыстання, iншымi словамi, на лесасеках.
Асаблiва маштабным i разнастайным плануецца зрабiць заключны этап акцыi «Тыдзень лесу».
— Пасля завяршэння лесапасадачных работ 12 красавiка, — зазначае Марыя Аскерка, — мы збяром усiх, хто будзе працаваць на тэрыторыi Лельчыцкага ляснiцтва на абсталяванай намi каля аўтадарогi Лельчыцы – Мазыр прыгожай зоне адпачынку. – Каб падтрымаць узнёслы настрой удзельнiкаў суботнiка, запрасiлi сюды самадзейных артыстаў Лiплянскага дома культуры i членаў школьных ляснiцтваў. Яны выступяць перад добраахвотнымi сябрамi лесу (мяркуецца, што iх будзе каля 300) з канцэртнай праграмай. Падкрэслiць важнасць праведзенай экалагiчнай акцыi плануем i частаваннем яе ўдзельнiкаў экалагiчна чыстымi дарамi лесу – журавiнавым морсам, мёдам з лясных вулляў, бярозавiкам...
