Ірына Глуская з гуртом “Каданс” у АрэнбурзеВакальны ансамбль “Каданс” паказаў жыхарам і гасцям Арэнбурга прыгажосць беларускіх песень, нашу культуру. А дэвіз самарцаў у суседзяў быў такі: “Культура — мова сяброўства і нацыянальнай згоды”.
План візіту, які заняў з дарогай чатыры дні, быў насычаным, уключаў пытанні гуманітарнага ды культурнага, моладзевага ўзаемадзеяння, супрацоўніцтва. Прайшоў і абмен досведам працы на карысць міжнацыянальнага міру і згоды. У складзе дэлегацыі, якую ўзначаліла Ірына Глуская, быў актыў моладзевага аддзялення суполкі, шэсць салістак “Каданса” і яго мастацкая кіраўніца Іна Сухачэўская. Праводзілі творчы дэсант прыгожа: на Самарскі чыгуначны вакзал прыйшлі прадстаўнікі этнааб’яднанняў вобласці, члены праўлення суполкі “Руска-Беларускае Братэрства 2000”, родныя і сябры ўдзельнікаў паездкі. Ірана Шаміева, актывістка Лігі азербайджанцаў Самарскай вобласці, прыгатавала нават вялікі падарункавы торт з надпісам “Самара + Оренбург = ВМЕСТЕ”.
Дзень першы: моладзевы
Прыехаўшы на месца, самарцы азнаёміліся з этнападворкамі ў Культурным комплексе “Национальная деревня”. Прыём быў гасцінным і цёплым. Паказалі гасцям і адметныя мясціны Арэнбурга. І ў той жа дзень праходзіў круглы стол “Шматнацыянальныя гарады: моладзевыя праекты міжнацыянальнага ўзаемадзеяння”. Сабраліся кіраўнікі розных моладзевых этнасуполак горада і вобласці. Самарцы дзяліліся досведам працы ў плыні падрыхтоўкі да Чэмпіянату свету па футболе-2018, матчы якога пройдуць і ў Самары. Расказалі пра падрыхтоўку да V Моладзевага форуму Прыволжскай федэральнай акругі “Волга-2017»”: ён, ужо традыцыйны, пройдзе ў чэрвені ў Самарскай вобласці. Сёлета будзе там і шматнацыянальная пляцоўка. Гаварылі пра важны патрыятычны праект самарскіх беларусаў: складанне рэестра воінаў, якія былі прызваны з Куйбышаўскай вобласці, загінулі, абараняючы і вызваляючы Беларусь, і пахаваны на беларускай зямлі.
Абмяркоўвала моладзь і розныя іншыя пытанні. Па выніках моладзевага форуму падпісана трохбаковае Пагадненне аб узаемадзеянні ды супрацоўніцтве, мэта Пагаднення — міжрэгіянальныя кантакты, духоўна-маральнае, патрыятычнае выхаванне і асвета моладзі. Напрыканцы круглага стала яго ўдзельнікі абмяняліся сувенірамі, а самарскія беларусы падарылі новым сябрам друкаваныя выданні пра народы сваёй вобласці. І потым ужо ў нефармальнай абстаноўцы, пад час чаявання, былі зацікаўленыя размовы. Дарэчы, і чаяванне было шматнацыянальным... Кіраўнікі этнасуполак частавалі гасцей нацыянальнымі прысмакі, а самарцы здзівілі ўсіх смачным тортам, які прывезлі з сабой. Вечарам беларускі ансамбль з Самары “Каданс” разам з ансамблем “Белая Русь” з Арэнбурга паўдзельнічалі ў Фестывалі беларускай культуры на Беларускім падворку. Гучалі прыгожыя народныя і сучасныя беларускія і рускія песні, беларусы згадвалі сваю гістарычную радзіму, расказвалі пра жыццё, справы беларусаў Самарскай і Арэнбургскай абласцей. У прыватнасці, самарцы даведаліся, што ў 1929-м беларускімі населенымі пунктамі Асякееўскага раёна Арэнбуржа лічыліся: арцель Бедната (66 чалавек), пасёлак Чырвоная Горка (108 чалавек), пасёлак Беларускі (139 чалавек). А ў Бугурусланскім раёне была вёска Новая Мікалаеўка, у якой жыло амаль 600 чалавек.
Цяпер беларусы Самары маюць новых сяброў у АрэнбурзеДзень другі: творчы
На другі дзень гурт “Каданс”, яго салісткі бліскуча выступілі ў конкурснай праграме першага Міжнароднага фестывалю-конкурсу дзіцячай, юнацкай і дарослай творчасці “Ярче солнца таланты блистают”. Гэта толькі частка Міжнароднага праекта “Душа моей Родины”, які праходзіў пры інфападтрымцы Мінкультуры Расіі. Пра ўнікальнасць, высокае майстэрства артыстак з “Каданса” ведаюць гледачы розных рэгіёнаў Расіі, а таксама і ў Беларусі: гурт выступаў на фэставых і святочных сцэнічных пляцоўках у гарадах на гістарычнай радзіме.
На фестывалі ў Арэнбурзе “Каданс” выканаў дзве песні ў конкурснай праграме: “Чатыры сыны” на беларускай мове і “Золотая ярмарка” на рускай. У намінацыі “Эстрадны вакал: ансамбль” самарцы — лаўрэаты 1 ступені. У намінацыі “Эстрадны вакал: сола” Лізавета Глубінец — лаўрэат 1 ступені, а Вераніка Кузняцова — лаўрэат 3 ступені. У конкурснай праграме яны выконвалі адпаведна патрыятычную песню “Помнят люди” ды ўкраінскую лірычную “Я молюся за тебе”.
Візіт у Арэнбург прайшоў цікава, графік мерапрыемстваў быў шчыльным і насычаным. “Ад самарскай суполкі беларусаў, сябе асабіста шчыра дзякую ўсім, хто ўдзельнічаў у прыёме і размяшчэнні нашай дэлегацыі ў Арэнбурзе, — гаворыць Ірына Глуская. — Асаблівыя словы ўдзячнасці адрасую Віктару Мяфодзьевічу Пархамовічу, старшыні Арэнбургскай абласной беларускай культурна-асветніцкай грамадскай арганізацыі. Дзякуй таксама Кацярыне Ракавай, якая ўзначальвае Асацыяцыю нацыянальных моладзевых этнасуполак Арэнбургскай вобласці “Вместе”, яна ж і намесніца старшыні беларускай суполкі Арэнбургскай вобласці. Мы ўдзячны і Яшару Дурсун Аглы Масімаву, старшыні грамадскай арганізацыі “Азербайджанская молодежь Оренбуржья”, і супрацоўнікам гасцінічнага комплексу “У Солохи” з іх дырэктаркай Аленай Залатаровай, і кіраўніцтву чувашскага Паб-рэстарана “Чапай”... Нас гасцінна прымалі, нам стварылі камфортныя ўмовы — таму і ўсё задуманае мы здзейснілі. Будзем і далей працаваць на ўмацаванне і пашырэнне міжрэгіянальных і міжнацыянальных сувязяў, усталёўваць творчыя кантакты за межамі вобласці. Бо вельмі важна ведаць тых, хто жыве побач з намі, разумець іх звычаі — каб разам будаваць грамадства, заснаванае на ўзаемнай павазе”.
Ад рэдакцыі. Спадзяемся, беларусы Арэнбургскай вобласці пяроймуць ад супляменнікаў з Самары і досвед супрацоўніцтва з газетай “Голас Радзімы”. І пазаштатнага аўтара Мікалая Бойку мы папрасілі паспрыяць такім кантактам. У прыватнасці, было б цікава больш даведацца пра сучаснае жыццё згаданых у тэксце беларускіх вёсак Арэнбургскай вобласці, пра актывістаў тамтэйшай беларускай суполкі, іх сувязі з гістарычнай радзімай, цікавыя грамадскія справы.
Голас Радзімы № 11 (3515), чацвер, 16 сакавіка, 2017 у PDF
