Адзін з самых папулярных праектаў канала — праграма «Кадры жыцця». Актрыса Святлана СУХАВЕЙ (на фота разам з Наталляй ВАРЛЕЙ) гэтым разам завітала ў госці да Сяргея КАЦЬЕРА.
Скарбонка каштоўнасцей
Тэлеперадачы, дакументальныя фільмы, ігравыя і анімацыйныя стужкі, тэлеверсіі спектакляў і канцэртаў… Дзесяць год штодня «Беларусь 3» прапануе пазнавальны і забаўляльны кантэнт, які прыцягвае ўвагу як дарослых, так і дзяцей. Цікавая лічба: кожны дзень першы (і адзіны!) айчынны сацыякультурны канал глядзяць больш за 850 тысяч чалавек. Па словах галоўнага дырэктара Галоўнай дырэкцыі «Беларусь 3» Наталлі Марынавай, важнае месца ў змястоўным напаўненні тэлеканала займае стварэнне тэматычных эфіраў, прымеркаваных да дзяржаўных святаў, памятных гістарычных падзей і юбілеяў выдатных дзеячаў беларускай навукі і культуры, а таксама прамыя трансляцыі богаслужэнняў, музычных конкурсаў і канцэртаў, значных мерапрыемстваў краіны.Чым яшчэ жыве канал сёння? Па-першае, працягваюць выходзіць любімыя праграмы «Дабраранак», «Калыханка», «Навіны культуры», «Беларуская кухня», «Сваімі словамі», «Жывая спадчына», «Кадры жыцця», «Камертон» і «Суразмоўцы». Творчая каманда тэлеканала заўсёды знаходзіцца ў пошуку цікавых тэм, што, безумоўна, прыносіць свой плён. Па-другое, за мінулыя некалькі год у эфіры з’явілася досыць шмат новых праектаў: «Кампазітары Беларусі», «Памяць зямлі маёй», «Гісторыя Беларусі. Бітвы», «Кафедра», «Гісторыя. Факты» і «Вечары з сімфанічным аркестрам». Радаваў тэлеканал і цікавымі дакументальнымі стужкамі, сярод якіх варта ўзгадаць фільмы «Штурман журналістыкі. Да 100-годдзя Рыгора Булацкага», «Імправізацыя. Памяці Міхаіла Фінберга», «Брэсцкая крэпасць», «Па слядах Купалы», «Крочым за Коласам» і «Дарога памяці», які з’явіўся дзякуючы супрацоўніцтву з Беларускім дзяржаўным музеем гісторыі Вялікай Айчыннай вайны. Нагадаем, большасць праектаў уласнай вытворчасці выходзіць на беларускай мове.
Прэм’ера за прэм’ерай
«10 гадоў — 10 прэм’ер» — пад такім слоганам пройдзе юбілейны для «Беларусь 3» тэлесезон. У дзень свайго нараджэння канал поўнасцю зменіць графічнае афармленне, а ў эфіры з’явіцца серыя відэаролікаў з віншаваннямі ад вядомых дзеячаў культуры нашай краіны.У суботу, 11 лютага, у 11:30 выйдзе першы выпуск сумеснага праекта Белтэлерадыёкампаніі і Нацыянальнай акадэміі навук «Навука побач». Ён прыйдзе на змену «Навукаманіі», але вядучая застанецца ранейшая — Кацярына Бярэцкая. У кожным выпуску «Навукі побач» пойдзе гаворка пра гісторыю стварэння тых рэчаў, без якіх чалавек ужо не ўяўляе жыцця. Даведаюцца гледачы і пра адкрыцці, што з імі звязаны, і пра перспектыўныя даследаванні.
У гэты ж дзень у 22:45 на тэлеканале пакажуць святочны канцэрт Сімфанічнага аркестра Белтэлерадыёкампаніі да 10-годдзя «Беларусь 3». Яшчэ адна цікавая прэм’ера запланавана на 12 лютага. У 11:45 у эфіры — першы выпуск тэлевіктарыны «Веды ў кубе». Каб высветліць, хто лепш ведае беларускую мову і літаратуру, удзельнікам трэба будзе адказаць на дзясятак пытанняў.
Акрамя таго, на працягу бліжэйшых месяцаў канал прадставіць шэраг новых пазнавальных праектаў. 19 лютага тэлегледачоў чакаюць прэм’еры штотыднёвай выніковай праграмы «Культурны тыдзень», якая раскажа пра апошнія падзеі ў культурным жыцці краіны, і спецыяльнага праекта «Вялікі тэатр» (да яго 90-годдзя). Перадачы цыкла дазволяць зазірнуць за кулісы і пазнаёміцца з тымі, хто кожны дзень стварае для беларусаў і гасцей краіны сапраўдную казку.
У сакавіку ў эфіры з’явіцца праект «Новыя людзі», героямі якога стануць таленавітыя навукоўцы, музыканты, мастакі, выканаўцы — лаўрэаты рэспубліканскіх і міжнародных конкурсаў. Таксама чакаем 10-серыйны цыкл аб развіцці эстрадна-сцэнічнага жанру ў Беларусі «Легенды эстрады». Дарэчы, новы дакументальны фільм рыхтуе і вядомы рэжысёр Сяргей Кацьер. Стужка раскажа пра народнага мастака Беларусі, скульптара Івана Міско, які ў лютым мінулага года адзначыў 90-гадовы юбілей.
leonovich@sb.by
