Сёння друкуем пытанні другога тура. Ён прысвечаны беларускай мове і літаратуры. Пытанні лёгкія, можна сказаць, школьная праграма. У кожным толькі адзін правільны варыянт. Нагадаем, прыняць удзел у віктарыне маюць права толькі паўналетнія. Чакаем адказы да 9 красавіка ўключна, іх трэба даслаць у рэдакцыю «Сельской газеты» з пазнакай «Колесо истории» па адрасе: 220013, г. Мінск, вул. Б. Хмяльніцкага, 10а, ці па электроннай пошце lukashik@sb.by.
Адказы павінны выглядаць так: 1 — а, 2 — б, 3 — в… У пісьме абавязкова ўказвайце свае поўныя прозвішча, імя і імя па бацьку, поўную дату нараджэння, дамашні адрас, нумар тэлефона для сувязі і дату ўдзелу ў віктарыне.
А цяпер — аб прыемным. Мы падрыхтавалі тры прызы. За першае месца — тэлефон SAMSUNG SM-M225F, за другое — мікрахвалевая печ Horizont 20MW700-1378B, за трэцяе — мульціварка Mystery MCM-1019. Разыграем іх сярод пераможцаў пяці тураў 20 мая. Для ўдзелу ў фінальным розыгрышы дастаткова і адной перамогі. Але памятаем: чым больш перамог у турах, тым болей шанцаў атрымаць прыз.
Азнаёміцца з разгорнутымі правіламі віктарыны можна па спасылцы www.sb.by/articles/pravila-sg.html.
Жадаем поспеху і перамогі!
Віктарына «Кола гісторыі»
ІІ ТУР. «Беларуская мова і літаратура»
1. Хто аўтар выказвання «Добра быць у дарозе, якую ты сам сабе выбіраеш»?
а) Якуб Колас;
б) Янка Купала;
в) Кузьма Чорны.
2. Як называецца ўпрыгажэнне ў выглядзе нанізаных на нітку шарыкаў ці дробных прадметаў іншай формы, якое надзяваюць на шыю?
а) паперкі;
б) пацеркі;
в) ланцужок.
3. Гэту расліну ў нас называюць беларускім шоўкам.
а) валошка;
б) лён;
в) шыпшына.
4. Якое слова прапушчана: «Як ад нараджэння звяры, што ходзяць у пустыні, ведаюць ямы свае; птушкі, што лётаюць у паветры, ведаюць гнёзды свае; рыбы, што плаваюць па моры і ў рэках, чуюць віры свае; пчолы і тым падобныя бароняць вуллі свае, — так і людзі, дзе нарадзіліся і ўскормлены, да таго месца вялікую … маюць» (Ф. Скарына).
а) пашану;
б) любоў;
в) ласку.
5. Аднавіце фразеалагізм: … труба (той, хто вельмі гучна гаворыць).
а) ерыхонская;
б) каломенская;
в) арыядніна.
6. Радзіма, Бацькаўшчына, Айчына — гэта словы…
а) амонімы;
б) паронімы;
в) сінонімы.
7. Князёўна, унучка Усяслава Чарадзея, настаўніца, асветніца, перапісчыца — гэта...
а) Рагнеда;
б) Еўфрасіння Полацкая;
в) Анастасія.
8. «Ресница» па-беларуску гэта…
а) вейка;
б) павека;
в) мігаўка.
9. Якія дрэвы з паэмы Якуба Коласа «Новая зямля» «пад белым пухам чуць заметны; яны так мілы, так прыветны, бы тыя красачкі-дзяўчаткі, надзеўшы гожыя апраткі»?
а) бярозы;
б) яліны;
в) яблыні.
10. У якім горадзе ёсць помнік беларускай літары «Ў»?
а) Нясвіж;
б) Полацк;
в) Тураў.
