Старанна працуе на сяўбе яравых Анатоль КУЗЬМІН.
— Яравы збожжавы клін у нас не вельмі вялікі — 150 гектараў, — расказаў аб ходзе работ галоўны аграном Юрый Смятана. — Пяць дзён спатрэбілася, каб закрыць план.
Але яшчэ шмат розных культур трэба пасеяць. Напрыклад, кукурузы на зерне — 220 гектараў, упершыню паспрабуем вырасціць рэдзьку алейную.
Работы ў сельгасфіліяле вядуцца ў комплексе. Вільгаць у глебе з дапамогай культыватараў закрываюць Аляксандр Апсіт і Сяргей Фірагін. З пасяўным агрэгатам старанна працуе Анатоль Кузьмін.
Глеба, перш чым пакласці ў яе насенне, запраўляецца мінеральнымі тукамі. Для гэтых мэт ёсць дзве хуткасныя самаходныя машыны «Раса». Кіраваць імі даручана Віктару Данцову і Ігару Капусціну. Своечасова забяспечваюць падвоз і загрузку тукаў Сяргей Іванчыкаў і Вячаслаў Рудэнка.
Ігар КАПУСЦІН запраўляе глебу мінеральнымі тукамі.
Яравым яшчэ ўзыходзіць у перспектыве, а на палях зазелянелі азімыя. Па словах галоўнага тэхнолага палёў, перазімавалі яны добра, а каб надаць усходам сіл і энергіі, іх трэба ўгнаіць, што і робяць чыгірынцы. Дзве падкормкі праведзены на ўсіх палях, а гэта 1039 гектараў. Дарэчы, і калійных, і фосфарных, і азотных тукаў у гаспадарцы пад поўную патрэбу, як і насеннага матэрыялу.
Паралельна ўносіцца арганіка. Механізатары Сяргей Брэндзікаў і Сяргей Смалоўскі раскідалі на палях 23 120 тон угнаенняў. Пагрузку забяспечвае на «Амкадоры» Аляксандр Смалоўскі.
Два трактары заняты на ворыве. Адным кіруе Мікалай Бабіцкі, другім — магутным «Беларус-3022» — пазменна Васіль Азаркоў і Юрый Драгін. Абодва магіляўчане, адкамандзіраваныя галаўным прадпрыемствам у «Чыгірынку» для вядзення палявых работ.
Як паведамілі ў райсельгасхарчы Кіраўскага райвыканкама, яравымі збожжавымі і зернебабовымі ў раёне засеяна 2328 гектараў, што складае 58 працэнтаў ад плана пры сярэднеабласным паказчыку 18 працэнтаў. Завершана на Кіраўшчыне першая падкормка азімых збожжавых і рапсу, зараз ва ўсіх гаспадарках вядзецца другая падкормка.
Аляксандр ХАХЛОЎ — спецыяльна для «СГ»
Фота аўтара