Пётр Балтруковіч ( у цэнтры) на сустрэчы ў Тальяці
У нашым Аўтагорадзе Пётр Іванавіч спачатку сустракаўся з кіраўніком Адміністрацыі горада Сяргеем Анташовым, потым — і з актывістамі беларускай суполкі “Нёман”, дырэктаркай Тальяцінскай бібліятэчнай карпарацыі Валянцінай Юсупавай, загадчыцай бібліятэкі “Истоки” Вольгай Горшаневай. Такі “расклад сустрэч” не выпадковы: з бібліятэкай мы ў супрацы даўно. У тальяцінскіх беларусаў там ёсць нават свой куток, у фондах беражліва захоўваюцца газеты і часопісы, якія атрымліваем з Беларусі.
Сустрэча праходзіла ў бібліятэцы. Можна сказаць: размова была душэўнаю, але і канструктыўнаю.
Дыпламат павіншаваў нас з тым, што “Купалінка”, вядомы беларускі творчы гурт з Тальяці, абараніў высокае званне “народны”. А потым яшчэ і з бляскам выступіў на абласным Фестывалі дружбы славянскіх культур у Самары — ён праходзіў у акруговым Доме афіцэраў. Мы расказалі, як адразу, на аўтавакзале адчулі цеплыню і ўвагу з боку Ксяндзова Алега Аляксандравіча, старшыні Самарскай рэгіянальнай грамадскай арганізацыі па захаванні ды развіцці самабытнасці беларускага народа “Белая Русь”. Нашых артыстаў павезлі ў сталовую ДТСААФ, накармілі смачным абедам. Потым — у Дом афіцэраў. Там нас сустракаў Іван Іванавіч Капліенка, старшыня Украінскага зямляцтва “Промiнь”. Далі нам асобную грымёрку. Карацей — усё здорава было. Добрыя вядучыя, шмат удзельнікаў з Самарскай вобласці, з Саратаўскай. “Купалінку” прымалі вельмі цёпла. Нам прыемна, што змаглі парадаваць сваёй творчасцю жыхароў Самары.
Вось так і варта беларусам падтрымліваць адзін аднаго, пагадзіўся з намі Пётр Іванавіч. Не сварыцца, а ўмець знаходзіць паразуменне. Тады ўсюды нас больш будуць паважаць. Мы абмеркавалі з дыпламатам надзённыя справы суполкі “Нёман”, падзяліліся бліжэйшымі планамі — у тым ліку й на лета. Дамовіліся, як далей супрацоўнічаць — на агульную карысць.
Людміла Дзёміна, кіраўніца беларускай суполкі “Нёман”, г. Тальяці