Цікава, што мастачак аб’ядноўвае не толькі імя. Яны на працягу ўсяго творчага жыцця непарыўна звязаны адна з адной: як настаўнік і вучаніца, як хросная маці і хросніца, як блізкія сябры. Каб наведвальнікі змаглі прасачыць гэту цесную сувязь і пераемнасць двух пакаленняў беларускай жывапіснай школы, выстава будзе падзелена на 2 этапы. Адкрыюць праект працы Літвінавай, або «вялікай» Зоі, як яе называюць арганізатары. Яна заслужаны дзеяч мастацтваў Беларусі, уладальнік ордэнаў Францыска Скарыны, больш за 50 гадоў правяла за мальбертам, стварыла сотні жывапісных палотнаў. З сярэдзіны лета на плошчы Якуба Коласа будуць выстаўлены рэпрадукцыі твораў Зоі «маленькай» — Луцэвіч.
У Мінску праект будзе экспанавацца да восені. За гэты час у межах праекта пройдзе шэраг творчых мерапрыемстваў: адкрытая экскурсія па экспазіцыі, мастацкі майстар-клас ад Зоі Луцэвіч, канцэрт новай акадэмічнай музыкі ў фармаце silent-event, адкрыты CINEMASCOPE са спецыяльнай кінапраграмай «Мастак і горад». У пачатку верасня экспазіцыя з работамі Зоі Луцэвіч пераедзе ў Брэст і ўпрыгожыць горад да яго 1000-годдзя. Упершыню сталічны праект пакінуў межы Мінска ў мінулым годзе — тады з ім пазнаёміліся жыхары Віцебска.
mila@sb.by
