— Адборачны этап даказаў, што паэзію Уладзіміра Сямёнавіча ведаюць і шануюць беларусы розных узростаў, — расказаў дырэктар канала «Культура» Уладзімір Трапянок. — Наш конкурс дазволіў кожнаму ўдзельніку па-свойму адчуць змест вершаваных радкоў класіка, перадаць іх эмацыянальны пасыл.
Цяпер работы канкурсантаў ацэньваюцца прафесійным журы і інтэрнэт-карыстальнікамі. Выступленні чытальнікаў выкладзены на сайце radiokultura.by і ў суполках канала ў сацыяльных сетках. Аддаць свой голас за канкурсантаў можа любы жадаючы.
Па выніках галасавання будуць вызначаны ўладальнікі прызавых месцаў па дзвюх катэгорыях і чатырох узроставых групах згодна з рашэннем журы, а таксама тры пераможцы па меркаванні інтэрнэт-карыстальнікаў. Лепшыя чытальнікі не толькі атрымаюць падарункі ад радыёканала, але і будуць запрошаны на запіс святочнай перадачы да юбілею з дня нараджэння Уладзіміра Караткевіча, якая прагучыць у эфіры «Культуры» 26 лістапада.
Конкурс чытальнікаў «Быў. Ёсць. Буду» праводзіцца дзеля папулярызацыі нацыянальнай літаратуры, актуалізацыі паэтычнай спадчыны Караткевіча, выяўлення лепшых выканаўцаў твораў і прыцягнення ўвагі да мастацкага радыёвяшчання.
mila@sb.by
