Украіна стала камнем спатыкнення ў свеце

Сёння ва Украіне Дзень годнасці і волі. На жаль, ён не стаў агульнанацыянальным. 21 лістапада абвешчана святам у гонар гадавіны “еўрамайдана”. Як і год таму тут не сціхаюць моцныя рэвалюцыйныя хвалі. З нагоды памятнай даты ў Кіеве пройдуць масавыя мерапрыемствы. Толькі фон для гэтай падзеі пафарбаваны не радаснымі колерамі і пачуццямі: працягваюцца грамадзянскае супрацьстаянне на паўднёвым усходзе, падзенне нацыянальнай эканомікі, узроўню жыцця насельніцтва.

Аднак прадстаўнікоў Самаабароны Майдана і Кааліцыі ўдзельнікаў “памяранцавай” рэвалюцыі гэта не спыняе — яны арганізоўваюць шэсце, пікет каля прэзідэнцкай адміністрацыі і “народнае веча”. Удзельнікі акцыі маюць намер прыняць Дэкларацыю, якая абвесціць Майдан вышэйшай уладай. На два гады плануецца ўвесці пераходны перыяд і сфарміраваць “урад нацыянальнага выратавання”. З аднаго боку, у яго ўвойдуць самі актывісты “еўрамайдана”, з другога — прапанова для палітыкаў (прэзідэнта, прэм’ера, Кабінета Міністраў, Вярхоўнай рады). Майданаўцы запэўніваюць: калі ўлады не прымуць Дэкларацыю да выканання — будзе абарона ўсімі даступнымі сродкамі. Вось так. Не больш не менш.

Тым часам Украіна стала камнем спатыкнення ў свеце, “гарачым” пунктам парадку дня форумаў розных фарматаў. Яна абмяркоўваецца разам з пытаннямі міжнароднай рэцэсіі, тэрарыстычнымі атакамі баевікоў “Ісламскай дзяржавы” на Блізкім Усходзе і наступствамі ліхаманкі Эбала. Краіны, эканамічныя саюзы і ваенна-палітычныя блокі падзяліліся адносна іх стаўлення да ўкраінскага крызісу. Уладзімір Пуцін на нядаўнім саміце “Вялікай дваццаткі”, узгадаўшы пра Косава, назваў неадэкватнай рэакцыю Захаду на ўваходжанне Крыма ў склад Расіі і абвінаваціў Еўропу і ЗША ў развязванні новай халоднай вайны. А Генсек ААН Пан Гі Мун наогул упэўнены — канфлікт ва Украіне падрывае сусветную эканоміку.

Тэндэнцыяй пагаршэння сітуацыі ў краіне-суседцы занепакоена і Беларусь: аб гэтым днямі ішла размова Аляксандра Лукашэнкі з кіраўніком МЗС Расіі Сяргеем Лаўровым.

Што ж адбываецца? Павышаны градус кіпення ва ўкраінскім катле выклікалі ўказы Пятра Парашэнкі аб эканамічнай блакадзе Данецкай і Луганскай абласцей. З Данбасу (зоны АТА) эвакуіраваны ўсе дзяржаўныя ўстановы і суды, спынена абслугоўванне банкаўскіх рахункаў, нават вывезлі вязняў з турмаў. Дзеянні ўкраінскіх улад, па сутнасці, гавораць аб выхадзе з мінскіх дамоўленнасцей, якія ўсталёўвалі “правілы гульні” для абодвух бакоў процістаяння. І гэта пры гатоўнасці да “татальнай вайны”...

Вядома, палітыка — мастацтва магчымага. Упэўнены, іншага шляху, чым шчыры дыялог з паўднёва-усходнімі раёнамі Украіны, у афіцыйнага Кіева няма.

Такія вось навіны. Сустрэнемся...