Почему электронная коммерция может изменить ресторанный бизнес

Калі офіс не ідзе на абед, то абед ідзе ў офіс

У Беларусі актыўна развіваюцца сэрвісы па арганізацыі дастаўкі ежы з рэстаранаў і кафэ праз інтэрнэт. Ваш сняданак, абед ці вячэру з любімай установы можна хутка даставіць на працу ці дадому — патрабуецца пара клікаў і няма неабходнасці кудысьці выходзіць. Пры гэтым кошт ежы з улікам дастаўкі застаецца практычна нязменным. У выніку кафэ і рэстараны атрымліваюць дадатковы прыбытак, а кліенты эканомяць час і сілы, адмаўляючыся ад гатавання. Пра тое, як сэрвісы сёння мяняюць рэстаранны бізнес і робяць яго больш зручным для спажыўца, падрабязней у матэрыяле карэспандэнта «Р».
Інфармацыйныя тэхналогіі сціраюць межы паміж рэстаранам і спажыўцом.
Фота РЕЙТАР

Пяць гадоў парытэту

За апошнія пяць гадоў, паводле інфармацыі Белстата, аб'ектаў грамадскага харчавання ў краіне істотна больш не стала. У 2017 годзе ў параўнанні з 2013 колькасць іх павялічылася на 967 адзінак да 12 978. Пры гэтым асноўны рост прыйшоўся на магазіны кулінарыі, буфеты, кафетэрыі, міні-кафэ і кафэ. У сваю чаргу колькасць рэстаранаў, бараў і закусачных за пяць гадоў скарацілася.

Можна прыйсці да высновы, што цяпер у грамадскім харчаванні назіраецца перыяд раўнавагі. Так, час ад часу змяняюцца ігракі і колькасна-якасны склад устаноў, але ў цэлым сітуацыя застаецца практычна нязменнай.

Людзі працягваюць звыкла хадзіць у рэстараны за атмасферай і смачнай ежай. Самі ўстановы, дакладней — іх большасць, працуюць па традыцыйных бізнес-мадэлях. Але ці магчымы рост там, дзе яго, здаецца, быць ужо не можа? Адказ — у новых каналах сувязі з кліентам і гнуткімі па цане прапановамі. Традыцыйным мадэлям сёння сур'ёзна наступае на пяткі перспектыўны фармат, які з’явіўся дзякуючы даступнасці інфармацыйных тэхналогій.
У СНД некалькі гадоў вялікую папулярнасць набіраюць сэрвісы па дастаўцы ежы з рэстаранаў у офіс або ў кватэру праз інтэрнэт-платформы. Гэтая бізнес-мадэль ужо паспела паказаць сваю эфектыўнасць на азіяцкім і амерыканскім рынку. На працягу некалькіх апошніх гадоў яна нядрэнна прыжылася і ў Беларусі.

Дастукацца да кліента

Варта адзначыць, што часта падобныя сэрвісы, як іх яшчэ называюць — агрэгатары, наогул ніяк не звязаныя з вырабам ежы. Яны гандлююць не стравамі ў звыклым сэнсе, а інфармацыяй аб наяўнасці страў у меню розных рэстаранаў. Інфармацыйныя агрэгатары займаюцца афармленнем заказаў і, пры наяўнасці свайго аўтапарка, — развозам ежы да спажыўца.

Акрамя таго, ёсць варыянты, калі агрэгатары толькі звязваюць кліента і ўстановы, а дастаўку арганізуюць самі кафэ. Незалежна ад абранай мадэлі, важнай задачай агрэгатараў з'яўляецца прасоўванне меню рэстарана праз таргетынгавую рэкламу, сацыяльныя сеткі і іншыя каналы.

Сур'ёзны ўплыў на развіццё беларускага рынку паслуг агрэгатараў аказаў сэрвіс, які паспяхова развіваецца ў Арменіі, Грузіі і прыйшоў у нашу краіну пару гадоў таму. Кампанія працуе як зборшчык і дастаўшчык заказаў. Тут яна пачала дзейнасць спачатку у Мінску, а крыху пазней перайшла на працу з установамі абласных гарадоў.

Многія ігракі своечасова падхапілі рынкавы трэнд і пачалі арганізоўваць сэрвісы з аналагічнай мадэллю. Дзякуючы гэтаму сёння ў людзей усё больш фарміруецца звычка заказваць ежу ў офіс з рэстаранаў і закусачных. Прычым сэрвісамі карыстаюцца не толькі заможныя спажыўцы, але і грамадзяне з сярэднім дастаткам — прапаноў на рынку хапае на любы густ. Даступнасці сэрвісаў спрыяе і развіццё канкурэнцыі ў сегменце: чым больш ігракоў, тым лепш цана.

Аднак, па словах уладальніка сэрвісу Аляксея Міліцы, пакуль што бізнес у гэтай сферы яшчэ не адчувае жорсткай канкурэнтнай барацьбы, незалежна ад наяўнасці буйных знешніх ігракоў і ў сувязі з вялікім з'яўленнем мясцовых сэрвісаў.

— Вядома, з улікам таго, што дадатковыя канкурэнты з'яўляюцца на рынку, гэта некалькі змяняе стан спраў, напрыклад, у абласных цэнтрах. Але я б не сказаў, што ў нас упалі заказы. Магчыма, запаволіўся рост, але ён працягваецца. Тануць, як гавораць, не пачалі.

Суразмоўца «Р» расказаў, што канкурыраваць у гэтым бізнесе сёння і прыцягваць новыя ўстановы можна цалкам эфектыўна. Уладальнікі закусачных і рэстаранаў могуць атрымаць прыкметны эфект: прасоўванне меню ў сетках здольна падняць продаж на 10—15 працэнтаў.

На думку Аляксея, сёння рэстаранам для большага ахопу аўдыторыі лепш размяшчацца на максімальнай колькасці такіх агрэгатараў. Яны будуць канкурыраваць за кошт таго, наколькі эфектыўна прасоўваюць інтарэсы ўстановы ў сеткі.

Таксама рэстараны і кафэ не абавязкова павінны знаходзіцца толькі ў абласных гарадах, каб супрацоўнічаць з агрэгатарамі. Сёння шэраг сэрвісаў працуе і з рэгіёнамі.

Тая ж цана на выхадзе

Наколькі ежа становіцца даражэй, калі яе заказаць не з рэстарана, а пры дапамозе агрэгатараў? Ні на колькі. Кошты застаюцца аналагічнымі рэстаранным — для кліента нічога не мяняецца ў канчатковым рахунку, акрамя таго, што яму зручней знаходзіць усе варыянты ежы на адной платформе.

Як правіла, агрэгатары зарабляюць на камісіі за пастаўленыя заказы. Таксама рэстаран можа плаціць не персаналу, які абслугоўваў кліента, а сэрвісу, які прымае заказ і адвозіць яго да месца. Такім чынам, кошт страў на сайце застаецца такім жа, як і ў меню. Аднак не выключана, што некаторыя сэрвісы вас абслужаць толькі пры тым, што вы зробіце мінімальны заказ на пэўную суму. А яна можа пачынацца, напрыклад, ад 10 рублёў.

Цікавы і той факт, што сярод заказаў у нашай краіне самым папулярным застаецца піца, далей — сушы, кітайская лапша, шаурма таксама набірае абароты. Раскручаныя франшызы хуткага харчавання таксама працуюць праз паслугі іншых агрэгатараў, незалежна ад наяўнасці ўласнага сайта або сэрвісу дастаўкі.

У цэлым многія сэрвісы не скіроўваюць свае намаганні на канкрэтны кантынгент. Але ўсіх спажыўцоў аб'ядноўвае адно: яны з'яўляюцца актыўнымі карыстальнікамі інтэрнэту. Улічваючы, што інтэрнэт штогод пранікае глыбей у жыццё чалавека — мэтавая аўдыторыя павінна павялічыцца, а значыць, і колькасць ігракоў будзе расці.
Эрык РОС.

Хуткасць яшчэ не ўсё. Галоўнае — імідж

Між тым нягледзячы на рост продажу, які абяцае выкарыстанне агрэгатараў, не ўсе ўстановы імкнуцца супрацоўнічаць з імі. Некаторыя, наадварот, адмаўляюцца ад гэтай ідэі, лічачы, што людзі абавязкова павінны прыйсці да іх асабіста. Паводле слоў шэф-повара рэстарана італьянскай кухні Эрыка Роса, канцэпцыя іміджавай установы не мае на ўвазе працу на хуткасць.

— Госць пагружаецца ў атмасферу нашага рэстарана, няспешна робіць свой заказ у суправаджэнні італьянскай музыкі. Так, безумоўна, мы можам страціць некаторы працэнт прыбытку, не выкарыстоўваючы паслугі дастаўкі і агрэгатараў. Але мы прыхільнікі таго, каб людзі менавіта прыходзілі да нас у госці. Для нас важна, каб ежа была высокай якасці і трапляла на стол прама з кухні без пасрэднікаў.

Неабходна таксама адзначыць, што іміджавыя рэстараны, у адрозненне ад кафэ і закусачных, робяць стаўку на такія практыкі, як, напрыклад, зносіны з шэф-поварам, які асабіста расказвае пра кухню, дае парады. Такое стаўленне да кліента таксама накіравана на стварэнне ўнікальнага сэрвісу, які магчыма атрымаць толькі пры наведванні ўстановы.

kryzhevich@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter