Самабытную культуру сваёй мясцовасці даследуе дзіцячы фальклорны ансамбль “Зараніцы” Краснаслабодскага сельскага дома народнай творчасці Акцябрскага раёна
Ці магчыма вывучыць танец альбо песню за адну гадзіну? Магчыма! Бярыце прыклад з юных артыстаў “Зараніц”. Яны цікавяцца нацыянальнымі здабыткамі, пераймаюць песніі танцы непасрэдна ў носьбітаў традыцыйнай культуры — бабулек і дзядулек, якія жывуць побач.
Так і павялося ў “Зараніцах” — хадзіць з пошукавымі міні-экспедыцыямі па хатах Краснай Слабады, іншых навакольных вёсак з адной толькі мэтай — паспець запісаць на плёнку як мага больш песень і танцаў...
— Потым збіраемся ў Доме культуры і развучваем запісанае, — удакладняе Валянціна Вараб’ёва. — Сама спачатку здзіўлялася: так хутка яны запамінаюць словы альбо “калены” ( гэта часткі ў танцах. — Аўт.)!
“Зараніцы” — калектыў малады і невялікі: існуе толькі пяць гадоў і налічвае каля двух дзесяткаў дзяцей. Аднак усё гэта не перашкаджае ансамблю расці прафесійна, удасканальвацца. І хаця геаграфія гастроляў ансамбля не выходзіць за межы Акцябрскага раёна, Валянціна Вараб’ёва спадзяецца, што поспех “Зараніцаў” не за гарамі.
— Каб працаваў калектыў, прыкладаем усе намаганні. Нельга не сказаць пра дапамогу дзяржавы: з 2005 года Красная Слабада — аграгарадок. Па праграме “Адраджэння і развіцця вёскі” ўзяліся і за будынак сельскага Дома культуры. Пасля рэканструкцыі і рамонту сёння тут працуюць бібліятэка, музычная школа, дом народнай творчасці і аматарскае аб’яднанне “Пошук”, якое таксама ўзбагачае рэпертуар “Зараніцаў” мясцовымі песнямі і танцамі...
Дапамагаюць Валянціне Васільеўне з дзіцячым калектывам педагог-арганізатар Святлана Удовіна і малады настаўнік музычнай школы Антон Бобрык. За ім — акампанемент “Зараніцам” на баяне. Дарэчы, Антон Аляксеевіч працуе ў Краснай Слабадзе па размеркаванні пасля Мазырскага каледжа ўжо другі год. Педагог плануе і далей працаваць у вёсцы.
— Збіраюся атрымліваць вышэйшую адукацыю і вучыць дзецей ігры на баяне, — тлумачыць Антон Бобрык. — Праца мне даспадобы. Як маладому спецыялісту, мне нават далі інтэрнат — месца ў новенькім “прэзідэнцкім” доміку. Чатыры дні працую тут, яшчэ два — у вёсцы Парэчча. Сам адтуль родам.
Пра такіх людзей скажаш — энтузіясты, працуюць за ідэю. Удзячныя вучні натхняюць займацца абранай на ўсё жыццё справай.
— Я пачаў працаваць з “Зараніцамі”, таму што такія калектывы трэба падтрымліваць. Па-першае, каб заняць вясковых дзяцей, а па-другое, каб яны маглі пазнаць народнае мастацтва.
Таццяна УСКОВА, “БН”
НА ЗДЫМКУ: «Зараніцы» разам кіраўніком калектыву Валянцінай ВАРАБ’ЁВАЙ і баяністам Антонам БОБРЫКАМ.
Фота аўтара
