Посетили жителей агрогородка Судники Воложинского района в день приготовления праздничных блюд

І вось вячэра зачалася...

У Суднікаўскім сельскім клубе Валожынскага раёна ў гэтыя святочныя днi бурлiць творчае жыццё. У аграгарадку шмат гадоў працуе суполка па інтарэсах «Восень», у якой займаюцца дзевяць актыўных жанчын cталага ўзросту. Кіруе клубам Таццяна Часнок. Усе каляндарныя святы ўдзельніцы гуртка адзначаюць так, каб былі яны непаўторнымі, вясёлымі для жыхароў роднай вёскі.


Суднікаўскія кожны месяц ладзяць вечарыны адпачынку, творчыя конкурсы, выставы страў і вырабаў рукадзелля. А ў пачатку студзеня жанчыны па традыцыі рыхтуюцца да святкавання Божага Нараджэння і Каляд, ходзяць шчадраваць па вёсцы, а іх з нецярпеннем чакаюць у хатах.

Удзельніцы «Восені» клапоцяцца аб тым, каб прыпасаў для калядоўшчыкаў хапіла. Некалькі простых рэцэптаў суднікаўскіх страў мы запісалі, каб падзяліцца з чытачамі.

Таццяна Часнок сустрэла нас у сельскім клубе прыбраная ў народны касцюм і пачала гаворку пра падрыхтоўку да святочнай вячэры. Яніна Шчапко з ахвотай падзялілася рэцэптам смакаты:

— Праваслаўныя вернікі ставяць на святочны стол 12 традыцыйных посных страў. Куцця — галоўная абрадавая на Каляды, без яе стол не будзе асаблівым. Гатую святочную кашу з года ў год. Яна звычайна з цэлых або тоўчаных ячных круп, прыпраўленая мёдам ці сытой і макам («макавым малаком»). Раней у больш заможных сем’ях куццю варылі з пшаніцы альбо нават рысу, дадавалі арэхі, разынкі ды іншую слодыч. Як рабіць яе? Усё проста: крупы перабраць, прамыць, заліць вадой на нач. Раніцай зліць яе ды ўкінуць крупы ў рондаль з падсоленым кіпнем. Варыць пакуль не набрыняе. Далей запякаю куццю ў печы, можна і ў духоўцы каля 40 хвілін пры 160 градусах. Да стала нясу яе з маслам і мёдам.

Бачым, што куцця — даволі простая страва, можна і на гарадской пліце прыгатаваць. А сакральны сэнс яе такі: спажыванне яды са збожжа, мёду і маку сімвалізуе дабрабыт, добрую волю і прымірэнне паміж роднымі і сябрамі. Пшаніца, мак і мёд — сімвалы дастатку і плоднасці.

Удзельніцы клуба адкрылі закручаныя банкі з грыбамі, капустай. З’явіўся і трохлітровік кампоту з белых парэчак і з лісткамі мяты. 


Жанна Мойса, бібліятэкар з Суднікаў, гатуе ў гэтым годзе кісель і печыва да каляднага стала. Суразмоўца трохі расказала пра іх:

— На нашым стале абавязковы аўсяны ці чырвоны кісель, узвар з сушаных фруктаў, рыбныя стравы (юшка, селядцы, шчупакі, карп), грыбны квас — поліўка з хлебнага квасу і грыбоў, чырвоны боршчык з «вушкамі», клёцкі з макам, капуста кіслая ці тушаная з грыбамі, макавыя сліжыкі. Гэта такое невялікае печыва з прэснага ці кіслага цеста. Яго ядуць таксама з «макавым малаком» ці мёдам.

Вось інгрэдыенты каляднага печыва: сталовая лыжка цукру, дрожджы, 3 сталовыя лыжкі малака, шклянка мукі і трохі солі. Трэба расцерці дрожджы з цукрам, заліць малаком, пасыпаць мукой, пакінуць у цёплым месцы на 15 хвілін, пакуль не пачне ўздымацца цеста. Рэшту мукі прасеяць, змяшаць з рэштай цукру і макам. Дадаць цеста, солі, крыху цеплаватай вады. Размяшаць і пакінуць на 30 хвілін пад ручніком. Пасля раскачаць цеста ў ролiк і нарэзаць на «гузікі» таўшчынёй каля сантыметра. Выкласці на змазаную алеем патэльню i запякаць у духоўцы 10 хвілін пры 160 градусах. А яшчэ слiжыкi можна 5 хвiлін адварыць у падсоленай вадзе, як галушкі. Будзе таксама вельмі смачна!

Пытаем у Таццяны Часнок, што згатуем разам з суднікаўскімі майстрыхамі кулінарнага мастацтва? Ідзём у хату кiраўніка сельскага клуба, дзе распальваецца печ.

— Вельмі просты рэцэпт навагодніх чабурэкаў: шклянка кефіру, 3 сталовыя лыжкі мукі, соль, 3 лыжкі сланечнікавага алею, адно яйка і 3 лыжкі мукі для раскачвання. Асобна рыхтуецца хатні фарш, сумесь перцаў і дзве цёртыя цыбуліны. Дадаем соль па гусце. Калі смажу ўсё ў печы, тады смак шыкоўны, — расказала Таццяна Часнок.

Тамара Багдановіч, удзельніца сельскага клуба, падзялілася пад канец нашай кулінарнай сустрэчы думкай:

— Можа, у вёсцы святочныя стравы не такія вытанчаныя і складаныя, як у горадзе, але яны народныя, удалыя і вельмі смачныя. Галоўнае — гатуем усё з добрым настроем і на здароўе!

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter