Народная газета

І ніякіх плямаў!

Набываючы шпалеры для кухні, мы арыентуемся на іх расфарбоўку. На што яшчэ звярнуць увагу?

Паколькі ў кухні, як і ў ванным пакоі, бывае досыць вільготна, для яе аздаблення таксама трэба выбіраць адпаведныя шпалеры. Папяровыя не падыдуць. Уявіце: з’явіцца на іх маленькая пляма — і тут жа расплывецца ў тлустую кляксу. А адмыць не атрымаецца! Папяровыя шпалеры хоць і самыя танныя, але і самыя непрактычныя, асабліва для кухні. Іх прыйдзецца часцей мяняць — якая ўжо тут эканомія?


Не лепшы выбар для кухні і тэкстыльныя шпалеры з бавоўны, лёну, шоўку, тым больш — з сухімі лісточкамі або кавалачкамі бамбуку. Глядзяцца яны, вядома, вельмі эфектна і прыгожа, але хутка ўбіраюць пахі і з часам пачынаюць выдзяляць не лепшыя водары.

Акрылавыя — таксама не вельмі добры варыянт: выпуклыя ўзоры не надта надзейна трымаюцца на папяровай аснове, таму іх лёгка сапсаваць. Ды і ў цэлым занадта аб’ёмныя шпалеры (нават з трывалым малюнкам) для кухні лепш не выбіраць — мастацкія выпукласці хутка забрудзяцца і страцяць сваю прывабнасць, а адмыць іх будзе вельмі складана.

— Кухонныя шпалеры павінны адпавядаць некалькім важным патрабаванням. Галоўнае — каб лёгка чысціліся (на ўпакоўцы рулона шукайце тры хвалі і шчотку). А яшчэ яны павінны быць вогнеўстойлівымі (на гэта паказвае полымя на этыкетцы), трывалымі і бяспечнымі, — тлумачыць прадавец-кансультант мінскага будаўнічага магазіна Ганна Сакалоўская. — Раю звярнуць увагу на вінілавыя, якія выдатна абараняюць сцены ад вільгаці і валодаюць масай іншых добрых якасцяў.

Часта можна сустрэць шпалеры з кухоннай тэматыкай, якія змяшчаюць мінімальны пласт вінілу — яны тонкія, абсалютна гладкія. Але для іх наклейвання патрабуюцца ідэальна роўныя сцены. А малюнкі — чайнічкі, кубачкі і гэтак далей — глядзяцца праставата.

Ёсць спецыяльныя кухонныя шпалеры — іх вырабляюць з водаўстойлівага ўспененага вінілу. Яны таксама выпускаюцца з кухоннай тэматыкай. Аднак назваць іх ідэальнымі для кухні таксама нельга. Па-першае, не ўсім падабаюцца гастранамічныя матывы на сценах. Па-другое, у такіх шпалераў адсутнічае шчыльны вінілавы пласт, і іх лёгка падрапае кот ці пашкодзіць дзіця.

Ідэальны варыянт для кухні — звычайныя вінілавыя шпалеры. Важна толькі, каб шчыльнасць пакрыцця была высокай. У магазіне можна нават пратэсціраваць такі тавар, пакратаўшы разгорнуты рулон рукамі. Калі верхні пласт камечыцца, значыць, ён не надта трывалы. Лепшыя шпалеры — гэта кампакт-вініл. Іх і пальцам не праціснеш, і не падрапаеш, а тым больш яны не пацерпяць, пасля таго як вы пачнеце прыбіраць забруджванні вільготнай анучай. Акрамя таго, такія шпалеры схаваюць усе дэфекты няроўных сцен, яны даўгавечныя, а расфарбоўка будзе радаваць вока. Праўда, і каштуюць яны нятанна.

Выпускаюцца таксама вінілавыя шпалеры пад афарбоўку, якія можна перайначваць 5—7 разоў (гэта таксама паказваецца на этыкетцы). Іх першапачаткова прадаюць белымі або каляровымі. Мінус хіба ў тым, што занадта вялікія рулоны — па 25 метраў даўжынёй і 1,06 метра шырынёй.

Набываючы шпалеры, заўсёды звяртайце ўвагу, на якой яны аснове — папяровай або флізелінавай. Другі варыянт найбольш прымальны, дарэчы, пры працы з такімі шпалерамі клей наносіцца не на іх, а на сцяну.
Выбірайце шпалеры пры розным асвятленні. Занадта яркае святло ў магазіне можа сказіць іх колер
У многіх кватэрах плошча кухняў невялікая. Таму, выбіраючы расфарбоўку шпалераў, важна не памыліцца, інакш замест радасці вас чакаюць засмучэнні. У маленькай кухні наўрад ці будуць дарэчы шпалеры цёмных тонаў, а таксама з буйнымі кантраснымі ўзорамі або выяўленымі вертыкальнымі палоскамі. Такая “адзежка” для сцен яшчэ больш звузіць і без таго невялікую прастору. Для маленькай кухні падыдуць шпалеры з дробным рэдкім малюнкам ці аднатонныя. Пры гэтым улічвайце асветленасць памяшкання. Калі кухня выходзіць вокнамі на поўнач, выбірайце цёплыя і светлыя адценні. На сонечным баку падыйдуць шпалеры ў халодных тонах.

Наш эксперт Ганна Сакалоўская падказвае, што ўся неабходная інфармацыя аб шпалерах звычайна змяшчаецца на этыкетцы. Прачытаўшы яе ўважліва, можна даведацца, як правільна наклеіць шпалеры, баяцца яны вільгаці і святла ці не. Трэба таксама абавязкова зверыць лічбавую маркіроўку ўсіх рулонаў — яна павінна быць адзінай. Гэта важна, паколькі адценні аднатыпных шпалераў з розных партый могуць адрознівацца. І не варта адразу выкідаць этыкетку пасля абклейвання сцен. Калі не хопіць шпалераў, вы можаце прад’явіць яе ў краме і купіць рулон, які падыдзе да ўжо паклееных шпалераў.

НА ЗАМЕТКУ

Папяровыя шпалеры, насычаныя воданепрымальнай сумессю, можна праціраць вільготнай анучкай. Але іх знешні выгляд часцяком не ўражвае. Да таго ж праслужаць такія шпалеры не больш за 3—4 гады і хутка выгараць на сонцы.

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Загрузка...