Гараджане пачалі збірацца ўздоўж агароджаў на праспекце Пераможцаў задоўга да старту калоны
Самая відовішчная частка свята — парад матацыклістаў. Шматтысячная калона байкераў у суправаджэнні спецпадраздзялення дарожна-патрульнай службы «Страла» УДАІ МУС праехала па галоўных праспектах Мінска ад Кургана Славы да Палаца спорту. Задоўга да старту калоны людзі, якія жадалі паглядзець на каларытных байкераў, пачалі збірацца ўздоўж агароджаў на праспекце Пераможцаў. За рухам калоны ад Кургана Славы гледачы назіралі з дапамогай устаноўленага на фасадзе ГЦ Galleria Minsk экрана.
Матацыклісты, у большасці сваёй зацягнутыя ў скуру, пранесліся міма гараджан вельмі эфектна: пад роў матораў і рок-музыку з дынамікаў. Прыпаркаваўшыся ля Палаца спорту, байкеры ахвотна размаўлялі з гараджанами і дазвалялі сфатаграфавацца з іх матацыкламі.
Атмасфера на свяце панавала адпаведная. Акрамя музыкі для гасцей арганізавалі забаўляльную праграму. Гэта і дрыфт-шоу на матацыклах і аўтамабілях, і «Шар смеласці», і кастам-шоу з эксклюзіўнымі матацыкламі. Мінчан пакарылі трукі лепшых стантрайдараў Harley-Davidson. Доўгая чарга выстраілася ля пляцоўкі, дзе выстаўляліся легендарныя матацыклы. Пракаціцца на іх маглі ўсе жадаючыя. Умова адна — наяўнасць адпаведнай вадзіцельскай катэгорыі.
— Я калісьці здзейсніў з сябрамі падарожжа на матацыклах. Праехаў сем тысяч кіламетраў, — прызнаўся са сцэны наш спявак Іван Вабішчэвіч (Дзядзя Ваня. — Аўт.). — У гэтым падарожжы з'явілася вельмі шмат уражанняў, якіх хопіць, напэўна, нават каб унукам расказваць.
Многія прыйшлі на свята сем'ямі. Муж і жонка Кацярына і Ігар з Гомеля прыехалі на закрыццё мотасезона на сваім чоперы.
— Для далёкіх падарожжаў гэтая мадэль адна з самых зручных, — лічыць галава сям'і. — Хочам убачыць, у каго якая тэхніка. Тут усё ж такі людзі з розных краін сабраліся. Можа, вясной на новую мадэль перасядзем...
На фестывалі было поўна дзяўчат: у банданах і касухах, яны дадуць фору любому мацёраму байкеру
А паглядзець сапраўды было на што. Толькі ў нашай краіне зарэгістравана каля паўмільёна матацыклаў. Тут і савецкая класіка — «Ява», «Днепр», «Мінск», і шустрыя «японцы», і легендарныя Harley-Davidson.
— З Эстоніі сюды прыехала каля ста чалавек, — расказвае прэзідэнт клуба Harley-Davidson Club Estonia Каспар Гаўгія. — Прыязджаем рэгулярна: увесну на адкрыццё мотасезона, увосень — на яго закрыццё. Мы тут ужо некалькі дзён. Наведваем гістарычныя славутасці. Літаральна ўчора былі на Лініі Сталіна.
У адказ на маё пытанне, як эстонцы ацэньваюць нашы дарогі, Каспар Гаўгія падымае вялікі палец уверх — спадабаліся. А дарогі гэтыя байкеры пабачылі самыя розныя.
Літоўская матацыклістка Ала Данасеня парадавалася магчымасці прыехаць у Беларусь без візы. Кажа, гэта стала добрым стымулам, каб паглядзець краіну. Байкер па духу, настаўнік матэматыкі ў старэйшых класах, Ала прызналася, што ў Літве жанчына ў байкерскім асяроддзі — такая ж рэдкасць, як і ў нас. Тым не менш на фестывалі было шмат дзяўчат. Брутальныя хлопцы іх паважаюць. Перш за ўсё за смеласць.
Латвіец Уладзіслаў, які прыехаў з Рыгі, таксама падзякаваў арганізатарам за «зялёны калідор» на мяжы:
— Ніколі не праходзіў мяжу так хутка! Учора пабывалі з экскурсіяй у Жодзіна на заводзе «БелАЗ». Фатаграфаваліся, каталіся... Уразіла!
Паназіраўшы за тым, як забаўляюцца дарослыя, мы накіраваліся на пляцоўку, якую арганізавалі спецыяльна для дзяцей.
— Павага адзін да аднаго на дарозе фарміруецца з дзяцінства, — упэўнены начальнік аддзела агітацыі і прапаганды ДАІ ГУУС Мінгарвыканкама Сяргей Заранік. — Таму мы зрабілі ўпор на забаўляльную праграму для дзяцей. Усе жадаючыя могуць паспрабаваць свае сілы на інтэрактыўным трэнажоры. Гэта сапраўдны матацыкл. Дзіця садзіцца на яго, апранае акуляры віртуальнай рэальнасці, і праграма мадэліруе для яго розныя дарожныя ўмовы. Напрыклад, праезд скрыжавання ці святлафора.
Фінальным акордам закрыцця мотасезона стаў святочны салют. Пасля яго мотарух афіцыйна стане на паўзу.
gorbatenko_inna@mail.ru