З Днём Незалежнасці суайчыннікаў павіншаваў Прэзідэнт Аляксандр Лукашэнка: “За апошнія гады шмат змянілася: і краіна, і людзі, якія ў ёй жывуць. Нязменным засталося жаданне кожнага з нас жыць у свабоднай і мірнай дзяржаве. Беларусам не патрэбныя ўзрушэнні, войны і рэвалюцыі, спекуляцыя на дэмакратыю і правы чалавека. Беларусь — стабільная дзяржава, якая цвёрда рухаецца па шляху самастойнага развіцця”.
Аляксандр Лукашэнка пажадаў кожнай беларускай сям’і шчасця, здароўя, дабрабыту і дастатку. Кіраўнік дзяржавы ўдзельнічаў у афіцыйных ўрачыстасцях з нагоды Дня Незалежнасці.
Грандыёзныя дзеі разгарнуліся каля стэлы “Мінск — горад-герой”. Шэсць тысяч чалавек і 500 адзінак тэхнікі прынялі ўдзел у парадзе. У неба падняліся каля 60 самалётаў і верталётаў. Ваенны парад войскаў Мінскага гарнізона і праходжанне тэхнікі грамадзянскага прызначэння завяршыліся традыцыйным масавым нумарам “Красуй, Беларусь!”
Назіралі за імпрэзамі дзясяткі тысяч гледачоў каля стэлы і мільёны ля тэлеэкранаў. Святкаванне Дня Незалежнасці прайшло па ўсёй краіне.
Фінальным акордам сталі гала-канцэрт, масавае выкананне гімна і святочны салют.
Голас Радзімы № 25 (3529), пятніца, 7 ліпеня, 2017 у PDF
