Гатуй сваё

Рэцэпты беларускай кухнi ад Юрыя Качука

СВIНIНА Ў КАПУСНЫМ РАСОЛЕ


Складнiкi: 300 г любiвай* свiнiны, 300 г капуснага расолу, 200 г адцiснутай ад расолу кiслай капусты, 2 морквы, 4 зубкi часнаку, 1 ст. лыжка тлушчу, кмен, прыправы.


Мяса цэлым кавалкам адварыць у капусным расоле з нацертай на тарцы морквай, дастаць з рондаля, нацерцi цiснутым часнаком, кменам i прыправамi, паставiць на блясе* з тлушчам запякацца ў духоўцы на 40 хвiлiн. Тым часам у пакiнуты расол пакласцi капусту i варыць без накрыўкi.


Спачатку на талерку пакласцi капусту, а потым запечанае мяса.


* Любiвая — нежирная


Бляса — противень


ГРЫБНЫ СУП


Складнiкi: 500 г свежых грыбоў, 1 цыбулiна, 2 ст. лыжкi сметанковага масла*, 2 ст. лыжкi мукi, 1 сыры яечны жаўток, 150 г вяршкоў, 1 1/2 л мяснога адвару, соль, зелянiна пятрушкi.


Сечаныя грыбы i цыбулю падрумянiць на масле у рондалi*, затым дадаць муку i адвар. Варыць на працягу 30 хвiлiн. Забялiць сумессю вяршкоў i ўзбiтага жаўтка. Пасалiць да смаку, пасыпаць зелянiнай пятрушкi.


* Сметанковае масла — сливочное масло


Рондаль — кастрюля


НАВАГРАДСКАЯ КАЎБАСА


Рэцэпт ад Людмiлы Смаляк, г. Наваградак.


Складнiкi: 10 кг ялавiчыны*, 3 кг свiнога сала (без скуры), сухiя ялавiчныя кiшкi, соль (на 1 кг ялавiчыны — 30 г солi, на 1 кг сала — 25 г солi), 1/2 ч. лыжкi салетры*, перац да смаку.


Свежую цёплую ялавiчыну нарэзаць невялiкiмi кавалкамi, абкачаць у прыправах i солi, пакiнуць на суткi ў халодным месцы, затым прапусцiць праз мясасечку. Халоднае сала дробна нарэзаць кубiкамi, пасалiць i змяшаць з мясам. Напакаваць начыннем сухiя ялавiчныя кiшкi.


Пры сушцы гэту каўбасу кожны вечар пракатваць качалкай i змяшчаць памiж дзвюх дошак, а зверху класцi груз. Ранiцай каўбасу падвешваць у цёплым месцы. Калi каўбасу павэндзiць, то пасля вэнджання яе на 1 хвiлiну пагрузiць у кiпень i потым абсушыць.


* Ялавiчына — телятина


Салетра — селитра


СМАЖАНIНА ПАЛЯЎНIЧАЯ


Складнiкi: 1 птушка (качка, дзiкая гусь), соль.


Тлустую птушку (качку, дзiкую гусь) абскубцi, памыць, пачысцiць, потым нацерцi соллю, загарнуць у лiсты лопуху, абмазаць глiнай i закапаць у прысак, вогнiшча ўвесь час падтрымлiваць. Праз паўтары гадзiны птушку дастаць, перавярнуць, засыпаць гарачым вуголлем i пакiнуць дапякацца яшчэ гадзiну. Пасля гэтага глiну разбiць, птушку ачысцiць.


САЛАДУХА


Складнiкi: 1 кг жытняй мукi, 150 г мёду, закваска (кавалак цеста ўвелькi з яйка).


Муку залiць гарачай вадой i размяшаць да атрымання вельмi вадкага цеста. Затым узбiць i паставiць на гадзiну у цёплую печ, каб тэмпература рошчыны была каля 40oС, за гэты час яе варта некалькi разоў памяшаць i, даўшы злёгку астыць, вылiць у дзежку, пакласцi кавалак закваскi, дадаць мёд, размяшаць, зверху прысыпаць злёгку мукой, накрыць ручнiком i паставiць у цёплае месца. Калi цеста пачне бушаваць, разлiць яго па збанах, шчыльна закрыць i паставiць у вольны жар печы на 12 гадзiн (з вечара да ранiцы). Затым выняць з печы гарачыя збанкi, хутка i як мага больш рэзка ахаладзiць, выставiўшы на моцны мароз або апусцiўшы ў снег. Потым iзноў збанкi з саладухай паставiць у печ. «Працэдуру» па нагрэве i наступнаму ахалоджваннi саладухi паўтарыць тры разы.


По просьбе уважаемого Ю.Качука причитающийся ему авторский гонорар будет перечислен на счета Зельвенского районного социально-педагогического центра и Центра коррекционно-развивающего обучения и реабилитации г.п. Зельва.

Заметили ошибку? Пожалуйста, выделите её и нажмите Ctrl+Enter