Музей, прысвечаны гісторыі Гродна і Гродзеншчыны, з'явіцца ў будынку былога Палаца культуры тэкстыльшчыкаў. Будынак у стадыі рэканструкцыі. Аднаўленне фасада амаль завершана — праведзена абліцоўванне цокаля мармурам, выкладзены гранітныя прыступкі, заменена сістэма водаадвядзення, устаноўлены пандусы і тактыльная плітка, першапачатковы белы колер фасада зменены на больш цёплы светла-карычневы. Цяпер работы актыўна вядуцца ўнутры. Мяркуецца, рэканструкцыя завершыцца ў маі 2021 года. Пасля ўводу ў эксплуатацыю будынак перададуць пад кантроль Гродзенскага гісторыка-археалагічнага музея. Яго работнікі ўжо распрацоўваюць праекты будучых экспазіцый.
Напрыклад, у цэнтры адной з залаў размесціцца шкілет маманта ў натуральную велічыню — пры яго стварэнні выкарыстаюць рэшткі жывёл часоў палеаліту, знойдзеныя ў Гродзенскай вобласці. Сваё адлюстраванне ў экспазіцыі з унікальнымі дакументамі, фотаздымкамі, макетамі і дыярамамі атрымаюць падзеі розных часоў, у тым ліку вайны 1812 года, Першай сусветнай і Вялікай Айчыннай. У наведвальнікаў будзе магчымасць зрабіць здымак на памяць у фотасалоне XIX стагоддзя, прагуляцца па вуліцах міжваеннага Гродна, акунуцца ў жыццё гарадской рыначнай плошчы і гэтак далей.
mila@sb.by