Выстава “Якуб Колас і Пятрусь Броўка. З душой, расчыненай наўсцяж…” — плён сумеснай працы як супрацоўнікаў музея, так і спецыялістаў з Дзяржаўнага літаратурна-мемарыяльнага музея Якуба Коласа, Нацыянальнага архіва Беларусі. Не сакрэт: Пятрусь Броўка набываў майстэрства дзякуючы ўважліваму стаўленню да працы старэйшых таварышаў, самымі ўплывовымі сярод якіх былі Якуб Колас і Янка Купала. То былі “паэтычныя настаўнікі” Петруся Броўкі, а пасля й чулыя старэйшыя сябры. І ўважлівасці да людзей, жыццялюбству паэт вучыўся ў Якуба Коласа. Іх творчым, жыццёвым стасункам і прысвечана выстава. Прадстаўлены фотаздымкі, рукапісы і асабістыя рэчы абодвух паэтаў.