Маштабны праект па выдачы магутнасці і сувязі Беларускай АЭС з энергасістэмай завершаны. Пра гэта напярэдадні прафесiйнага свята паведаміў журналістам міністр энергетыкі Віктар Каранкевіч. Па сваёй важнасці, адзначыў ён, праект не мае аналагаў на тэрыторыі нашай краіны.
— Усяго пабудавалі больш за тысячу кіламетраў паветраных ліній перадачы напружаннем 330 кВ, мадэрнізавана каля 700 кіламетраў дзеючых ЛЭП 110—330 кВ. Рэканструявалі чатыры буйныя падстанцыі, а таксама пабудавана новая — «Паставы». Пачынаючы са снежня гэтага года лінія электраперадачы, якая звязвае гэтую падстанцыю з БелАЭС, пастаўлена пад напружанне. Можна сказаць, што станцыя атрымала першы подых.
Таксама працягнецца праца па будаўніцтве на аб’ектах «Белэнерга» пікарэзервовых крыніц і электракатлоў сумарнай магутнасцю каля 800 МВт і 916 МВт адпаведна:
— Усё гэта неабходна для таго, каб забяспечыць надзейную і бесперабойную работу энергасістэмы пасля ўводу ў эксплуатацыю БелАЭС.
Станцыя дазволіць краіне зменшыць выкарыстанне да 5 млрд кубаметраў прыроднага газу ў год, а таксама сур`ёзна знізіць выкіды парніковых газаў — да 10 млн тон у год. Усё гэта надасць новы інтэлектуальны і тэхналагічны імпульс развіццю краіны і забяспечыць гарантыі ўмацавання яе дзяржаўнай незалежнасці і эканамічнай бяспекі.
Падводзячы вынікі адыходзячага года, Віктар Каранкевіч падкрэсліў: аб’ём вытворчасці электраэнергіі ў краіне павялічыўся на 11,6 працэнта ў параўнанні з 2017-м. Сёння гэта больш за 38 млрд кілават•ч. Гэта абумоўлена цэлым шэрагам фактараў, адзін з якіх — поўная адмова з гэтага года імпарту электраэнергіі з-за межаў краіны. У 2019-м гэтая тэндэнцыя будзе працягнута:
— Мы змаглі выпрацаваць неабходную электраэнергію на ўласных крыніцах з меншымі выдаткамі. Акрамя таго, павялічылі яе пастаўкі на экспарт — да 1 млрд кілават•ч, што звыш сямі разоў больш за ўзровень 2017 года. Таксама мае месца рост спажывання электраэнергіі рэальным сектарам эканомікі, што гаворыць аб актывізацыі вытворчасці прадукцыі прамысловымі прадпрыемствамі і росце эканомікі краіны ў цэлым.
Дарэчы, наконт экспарту электраэнергіі: з уводам БелАЭС ён можа пашырыцца. Па словах Віктара Каранкевіча, гэтае пытанне — на кантролі.
— Вядома, у першую чаргу БелАЭС будуецца для забеспячэння патрэб спажыўцоў краіны. Але калі будуць магчымасці, а ў нас ёсць ЛЭП з Украінай, Расіяй, Прыбалтыкай, зможам разгледзець пастаўкі электрычнай энергіі. Што тычыцца супрацоўніцтва з Польшчай, ёсць магчымасць рэанімавання існуючай альбо будаўніцтва новай лініі. Пры зацікаўленасці з боку Польшчы мы гатовы ў любы момант разгледзець варыянты ўзаемадзеяння. Але ва ўсім павінна быць эканоміка.
arteaga@sb.by
Завершен проект по выдаче мощности и связи БелАЭС с энергосистемой страны
Энергія ў патрэбным рэчышчы
Полная перепечатка текста и фотографий запрещена. Частичное цитирование разрешено при наличии гиперссылки.