Аб адукацыйным анімацыйным праекце сумеснай вытворчасці “Беларусьфільма” і расійскай студыі “М.И.Р.” сёння ведаюць ва ўсім свеце. Ён быў прэзентаваны ў Амерыцы, Італіі, Францыі і іншых краінах. Расійскі ўрад узнагародзіў яго ганаровай прэміяй у галіне культуры, а музей “Луўр” уключыў фільмы цыкла ў спецыяльную праграму для паказу дзіцячай аўдыторыі.
Сэнс праекта — даступным спосабам распавесці аб доўгім жыццёвым шляху вялікіх кампазітараў, іх памкненнях і дасягненнях. Задача не з простых — рэжысёры абмежаваны ў хронаметражы. Аднак і расійскія, і нашы рэжысёры нядрэнна з ёй спраўляюцца. Сярод фільмаў беларускай вытворчасці — карціны, прысвечаныя Сяргею Пракоф’еву (рэжысёр Юлія Цітова), Роберту Шуману і Іагану Баху (Алена Пяткевіч), Людвігу ван Бетховену (Уладзімір Пяткевіч) і Фрэдэрыку Шапэну (Ірына Кадзюкова). Серыя, прысвечаная Шапэну, якая намінавана на сёлетняга “Залатога арла”, пачынаецца з вострава Маёрка, дзе галоўны герой бавіць час у кампаніі французскай пісьменніцы Жорж Санд. Аднойчы ўвечары па просьбе яе дачкі кампазітар пачынае распавядаць пра сябе — успамінае, як ужо ў тры гады складаў першыя мелодыі ў бацькоўскім доме, а ў восем музіцыраваў у вялізнай зале палаца Радзівілаў падчас балю.
Фільмы з цыкла “Казкі старога піяніна” неаднаразова намінаваліся на прэмію “Залаты арол”, а карціна “І. С. Бах” беларускага рэжысёра Алены Пяткевіч стала яе лаўрэатам у 2012 годзе. Ці атрымаецца ў Ірыны Кадзюковай паўтарыць дасягненне сваёй калегі і займець фігурку “Залатога арла”, даведаемся 23 студзеня, калі адбудзецца ўручэнне чарговай прэміі.
