Пра ўрачыстую цырымонію ўскладання вянка ад Пасольства Беларусі ў Маскве да Магілы Невядомага салдата ля Крамлёўскай сцяны напярэдадні паведамлялася і на сайце ФНКА “Беларусы Расіі”: усіх ахвочых запрашалі далучацца. Памятнае мерапрыемства прысвячалася 73-й гадавіне Перамогі. У ім прынялі ўдзел Пасол Беларусі ў Расіі Ігар Петрышэнка, дзяржсакратар Саюзнай дзяржавы Рыгор Рапота, ветэраны Вялікай Айчыннай, прадстаўнікі беларускай дыяспары, дыпламаты. Кветкі былі ўскладзены таксама й да памятных знакаў “Горад-герой Мінск” і “Брэсцкая крэпасць-герой”: на Алеі гарадоў-герояў у Аляксандраўскім садзе.
Узорны аркестр Ганаровай варты Маскоўскага гарнізона выканаў Дзяржаўны гімн Беларусі. Перад удзельнікамі мерапрыемства ўрачыстым маршам прайшла рота 154-га асобнага каменданцкага Праабражэнскага палка.
А ў Дзелавым і культурным комплексе беларускага Пасольства ў Маскве ў той жа дзень, 3 мая, прайшла сустрэча з ветэранамі вайны, адкрылася выстава “У баях за Айчыну” Беларускага дзяржаўнага музея гісторыі Вялікай Айчыннай вайны.
Аліна Немагай
Голас Радзімы № 17 (3569), пятніца, 11 мая, 2018 у PDF
