Як гаворыць біблейскае паданне, у Іакіма і Ганны, жыхароў Назарэта, не было дзяцей. Святар іерусалімскага храма з гэтай прычыны нават не браў у вялікае свята дароў ад Іакіма, бо той быў бяздзетны, а дзеці лічыліся ласкай Божай. Жонка, дачуўшыся пра такую бяду, сышла ў пустыню, села пад лаўровым дрэвам і доўга журылася.
Але праз нейкі час да Ганны з’явіўся анёл, які прамовіў: “Ты зачнеш і народзіш дачку, благаславёную, вышэйшую над усімі. Праз яе атрымаюць благаславенне Божае і ўсе зямныя народы. Праз яе людзям будзе даравана ўратаванне. Яе імя будзе Марыя”.
Такі ж знак ад анёла атрымаў Іакім. Муж і жонка сустрэліся ля Залатой брамы Іерусаліма і абмяняліся навіной. Затым памаліліся ў храме. А праз дзевяць месяцаў у Ганны нарадзілася дачка — Марыя. Іакім з нагоды нараджэння дачкі прынёс у храм вялікія дарункі Богу.
Пад імем Найсвяцейшай Дзевы дачцэ назарацян наканавана будзе стаць маці Збавіцеля — Ісуса Хрыста.
Царква адзначае Дзень нараджэння Прасвятой Уладычыцы нашай Багародзіцы і Прыснадзевы Марыі з IV стагоддзя. Гэта першае дву-надзесятае свята ў царкоўным календары, бо даўней год пачынаўся з 1 верасня.
