Вайскоўцы ў пешай калоне прыкладаюць усе намаганні, каб прайсці прыгожа.— Цяпер ідзе актыўная падрыхтоўка, — камандуе парадам намеснік міністра абароны генерал-маёр Сяргей Патапенка. — Пешыя калоны трэніруюцца тры разы на тыдзень на пляцы Мінскай ваеннай камендатуры, механізаваныя калоны — на аэрадроме Ліпкі. Генеральныя трэніроўкі намечаны на 5 і 7 мая.
Ваенная моц
У складзе пешай калоны пройдуць 22 парадныя разлікі — гэта больш за 3000 чалавек. Першымі будуць чаканіць крок сувораўцы, за імі — кадэты, франтавая каробка, партызанская, афіцэрская, вайскоўцы ВПС і СПА, пагранічная служба, міліцыянеры, унутраныя войскі, ратавальнікі. Замыкаюць пешую калону ваеннаслужачыя сіл спецыяльных аперацый. У складзе пешай калоны пройдуць і дзве жаночыя каробкі — Узброеных Сіл і МУС. Таксама ў парадзе плануецца ўдзел вайскоўцаў з Расіі і Кітая.
У складзе пешай калоны пройдуць 22 парадныя разлікі — гэта больш за 3000 чалавек.У небе над Мінскам праляцяць 42 паветраныя судны, а ў складзе механізаванай калоны праедуць 185 адзінак тэхнікі. Узначаліць яе легендарны танк Т-34, за ім пройдуць парадныя разлікі новай і мадэрнізаванай тэхнікі нашага войска.
— Напрыклад, рэактыўная сістэма залпавага агню «Флейта», — удакладніў Сяргей Патапенка. — Практычна ўся тэхніка будзе на колах, гусенічны — толькі адзін парадны разлік.
Ля стэлы «Мінск — горад-герой» ужо пачалі манціраваць трыбуны.У тэмпе маршу
Ідзе трэці тыдзень узмоцненых трэніровак. Цяперашняе надвор’е з тэмпературай паветра крыху вышэй за нуль для іх — ідэальнае. Міхаіл Дзямчук служыць у 38-й асобнай гвардзейскай дэсантна-штурмавой брыгадзе, выдатнік страявой падрыхтоўкі:
— Трэніруемся і па сем гадзін у дзень. Рукі і плечы расслабленыя, грудзі наперад, а шыя і ногі напружаны. Нялёгкая, але вельмі адказная праца. Мы прыкладаем усе намаганні, каб прайсці прыгожа. У каробцы 150 чалавек. Калі хто-небудзь з нас не падымае нагу, шарэнга маментальна пачынае ссоўвацца, а за ёй і ўся каробка. Трымаць раўненне — наша галоўная задача, таму я заўсёды павінен бачыць грудзі чацвёртага вайскоўца ад мяне. Для выраўноўвання шарэнгі левафлангавыя падказваюць, каму падцягнуцца.
Рота ганаровай варты рыхтуе да свята асаблівую праграму.За некалькі дзясяткаў метраў да трыбуны сцяганосцы падаюць каманду: «Увага, лік!» І ўсе 150 чалавек сінхронна паварочваюць галовы. Байцы зладжана чаканяць крок, каб быў характэрны воплеск.
Падчас праходжання пешай калоны аркестр іграе «папуры» з рэпертуару нашых кампазітараў, за адным выключэннем — песні Давіда Тухманава «День Победы». Сёлета тэмп — 114 удараў у хвіліну. Гэта хутка. Аркестр падладжваецца пад дырыжора, а той сочыць за агульнай карцінай праходжання пешай калоны. Перыядычна ўносіць папраўкі, у які момант музыкам запаволіцца, а калі іграць хутчэй.
ikras@sb.by
