Рейд: как лесники в эти засушливые дни защищают лес от пожаров

Дрон па-над соснамі

З-за сухога надвор’я, што ўсталявалася апошнім часам, у лясах наступіў ІІІ клас пажарнай небяспекі. Невялікае пахаладанне, а таксама хуткія навальнічныя ліўні, што пранесліся ў розных рэгіёнах, істотнага ўплыву на сітуацыю не аказалі. У дзясятках раёнаў краіны аб’яўлены абмежаванні, а то і забароны на наведванне лясоў. Для кантролю за выкананнем іх праві­лаў работ­нікі ляс­ной ахо­вы пра­во­дзяць рэйды, у адзін з якіх выпра­віла­ся і ка­рэс­пан­дэнт «Р».

Аператыўна выяўляць пажары і знаходзіць ачаг узгарання дапамагае беспілотнік

Уезд забаронены

З пачатку года на тэрыторыі краіны адбылося ўжо 953 выпадкі лясных пажараў, прычым літаральна 2 з іх — за апошнія суткі. Гэта колькасць перавышае паказчык за аналагічны перыяд мінулага года. Праўда, агульная пло­шча пашкоджаных агнём лясоў меншая, чым летась, таму што большасць пажараў выяўлена і ліквідавана на ранняй стадыі. 

Зараз наведванне лясоў забаронена ці абмежавана ў 43 раёнах краіны, у тым ліку ў 19 раёнах Гомельскай вобласці і ў 14 — Мінскай. Сёння мы праверым, ці выконваюць гэтыя правілы ва Уздзенскім раёне Мінскай вобласці.

У большасці выпадкаў лясныя пажары ўспыхваюць па віне чалавека.

— З-за сухога надвор’я грыбоў у лесе амаль няма, — адразу расчароўвае Дзмітрый Віяленцій, інжынер па ахове і абароне лесу Уздзенскага лясгаса. — Хіба толькі лісічкі можна знайсці дзе-небудзь у нізінах. Заканчваецца сезон чарніц. Тым не менш людзі імкнуцца ў лес: хтосьці ўсё ж спадзяецца знайсці грыбы, іншыя ідуць па апошнія чарніцы, якія зараз узняліся ў цане. А літаральна ўчора пачаўся сезон збору брусніц.

На тэрыторыі Уздзенскага раёна з 3 жніўня дзейнічае абмежаванне на наведванне лясоў, прынятае рашэннем мясцовага выканкама. Гэта значыць, што людзі могуць знаходзіцца на тэрыторыі ляснога фонду, але не маюць права заязджаць у лес на машыне, распальваць вогнішчы, выкарыстоўваць адкрыты агонь, праводзіць работы, не звязаныя з вядзеннем лясной гаспадаркі, ладзіць масавыя мерапрыемствы.


— Рэйд — гэта не прагулка па лесе, — папярэджвае Дзмітрый Пінчук, начальнік аддзела аховы і абароны лесу Дзяржаўнага вытворчага лесагаспадарчага аб’яднання Мінскай вобласці. — Хадзіць — абавязак лесніка. Уся тэрыторыя раздзелена на абходы, гэта значыць участкі лесу, замацаваныя за кожным чалавекам. У яго ёсць маршрут патрулявання, на якім трэба сачыць за парадкам, прыбіраць, калі трэба, кантраляваць стан шлагбаумаў, аншлагаў, квартальных слупоў. Рэйды ж накіраваны менавіта на прафілактыку і выяўленне парушэнняў ляснога прыродаахоўнага заканадаўства. Інжынерна-тэхнічныя работнікі, прадстаўнікі лясгасаў і лясніцтваў аб’язджаюць тэрыторыю на машынах. Яны ведаюць грыбныя і ягадныя месцы, папулярныя ўезды.

Дзмітрый ПІНЧУК.

З цыгарэтай у руках

Рухаемся па тэрыторыі Лашанскага лясніцтва. Уезды ў лес закрыты шлагбаумамі, праз пэўныя адрэзкі ўсталяваны аншлагі з патрабаваннем прытрымлівацца правілаў пажарнай бяспекі. Але што гэта? На адным са з’ездаў шлагбаум адсунуты, а на пяску засталіся свежыя адбіткі аўтамабільных пратэктараў. Шлагбаум тут жа вяртаецца на месца, а мы пешшу рухаемся ў глыбіню лесу.

Сухі мох храбусціць пад нагамі, як снег. Хто сказаў, што чарніцы заканчваюцца? Зусім побач з трасай разросся даволі буйны ягаднік, там і сям чарнеюць ягадкі, праўда, невялікія памерам. Крыху далей натыкаемся на бруснічнік, які зіхаціць рубінавымі кроплямі. Паблізу нікога не відаць, і мы вяртаемся да шлагбаума. 

Пры абмежаванні доступу ў лес пешшу туды ісці можна, а заязджаць на машыне — нельга.

— З пачатку пажаранебяспечнага сезона, які ў гэтым годзе з-за бясснежнай зімы пачаўся тыдні на два раней, з першых дзён сакавіка, у Мінскай вобласці праведзена 609 рэйдаў, 64 з іх — за апошні тыдзень. Па іх выніках да адміністрацыйнай адказнасці прыцягнуты 81 чалавек, — у чаканні парушальніка расказвае Дзмітрый Пінчук. — Два дзясяткі парушэнняў удалося выявіць з дапамогай сродкаў фотафіксацыі. 

Камеры відэаназірання, якія рэагуюць на рух, робяць серыю здымкаў і адпраўляюць іх на мабільны тэлефон спецыяліста, зарэкамендавалі сябе як дзейны сродак барацьбы і з «падпальшчыкамі», і з ахвотнікамі пачаць сезон збору брусніц і клюквы раней, чым дазволена, і з тымі, хто засмечвае лес. Ва Уздзенскім лясгасе іх сем.



Даносіцца ціхае вуркатанне матора, і на лясной дарозе з’яўляецца машына. За рулём — дама, якая вельмі бянтэжыцца, убачыўшы закрыты шлагбаум і мужчын у форме лясной аховы. Аказваецца, з дарогі яна збочыла, каб праверыць, ці дастаткова нарасло брусніц. Аб абмежаваннях на наведванне лясоў чула, але не ведала, ці ёсць яны ва Уздзенскім раёне. Дарэчы, удакладніць інфармацыю можна з дапамогай інтэрактыўнай карты на сайце Мінлясгаса. 

Што ж, няведанне закона не вызваляе ад адказнасці. КоАП прадугледжвае за парушэнне патрабаванняў пажарнай бяспекі санкцыі ад папярэджання да 25 базавых велічынь. У дадзеным выпадку абыходзімся папярэджаннем.


Паездка ўздоўж лесу працягваецца. Там і сям каля ўездаў прыпаркаваны машыны, і гэта правільна. Але вось заўважаем мужчыну, які выходзіць з гушчару. Адной рукой ён вядзе веласіпед, у другой трымае цыгарэту. Прызвычаіць яго да здаровага ладу жыцця мы наўрад ці зможам, а вось расказаць аб небяспецы, якую можа несці кінуты недакурак, — вельмі проста. Дзядзьку даводзіцца пра­слухаць прафілактычную размову, падчас якой ён не раз сцвярджае, што недакуркі заўсёды старанна тушыць.

Калі такое сухое надвор’е пратрымаецца да канца тыдня, можа наступіць IV клас пажарнай небяспекі, пры якім доступ у лясы ўвогуле забараняецца. Гэтая мера апраўданая: у 90 працэнтах выпадкаў лясныя пажары пачынаюцца па віне чалавека. 

nevmer@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter