Гэта стала зразумела яшчэ падчас прэзентацыi цэнтра. Усiх гасцей, сярод якiх былi маладыя акцёры, рэжысёры, сцэнографы, тэатразнаўцы, пад грукат друкарскай машынкi па спiсаных у творчых пакутах лiстах паперы запрашалi ў залу, дзе на эксперыментальнай сцэнiчнай пляцоўцы тэатра i былi паказаны экспрэс-пастаноўкi п’ес. Канстанцiна Сцешыка — “Мужчына, жанчына, пiсталет”, Сяргея Гiргеля — “Сталiца ЭРАУНД”, Ганны Саламянскай — “Галошыкi”, а таксама п’есы маладога расiйскага драматурга Алены Iсаевай “Пра маму i пра мяне”.
Кожная з iх выклiкала цiкавасць у гледачоў. Пра гэта сведчылi не толькi апладысменты, але i мноства пытанняў з залы. П’еса”Мужчына, жанчына i пiсталет” атрымала высокую ацэнку на мiжнародным конкурсе маладых кiнадраматургаў “Еўразiя-2005”.
Дружны смех выклiкаў урывак з парадаксальнай камедыi “Сталiца ЭРАУНД”, прэм’ера якой, дарэчы, у хуткiм часе адбудзецца на сцэне РТБД. Смяялiся да слёз не столькi з камiчнай сцэны, колькi з сябе самiх, у нейкай ступенi эгаiстычных, асцярожных, такiх упэўненых у сабе i разгубленых адначасова. Адным словам, усяго за нейкiя паўгадзiны кожная з экспрэс-пастановак нiкога не пакiнула раўнадушным.
— Адна з галоўных задач створанага пры тэатры Цэнтра беларускай драматургii i тэатральнага мастацтва — актыўнае далучэнне творчай моладзi да сцэнiчнага працэсу, — адзначае памочнiк мастацкага кiраўнiка Рэспублiканскага тэатра беларускай драматургii Вацлаў Валадзько. — Цэнтр прызваны спрыяць пошуку i прапагандзе новых формаў, iдэй i канцэпцый сучаснага тэатральнага мастацтва. Прыярытэтны накiрунак дзейнасцi цэнтра — работа з маладымi драматургамi, рэжысёрамi, акцёрамi, тэатральнымi мастакамi i кампазiтарамi, аказанне iм творчай i арганiзацыйнай падтрымкi, практычнай дапамогi ў авалодваннi прафесiйнымi навыкамi i, канешне, рэгулярная дэманстрацыя iх творчых дасягненняў. У цэнтры будзе праводзiцца рознабаковае па форме сцэнiчнае апрабаванне драматычных твораў. Гэта аўтарскае i акцёрскае чытанне п’ес, падрыхтоўка экспрэс-пастановак, правядзенне творчых дыскусiй, кансультацый, абмен рэпертуарам i вопытам, паказ эксперыментальных спектакляў.
Будзем спадзявацца, што цэнтр для многiх, хто толькi пачынае свой шлях у тэатральным мастацтве, сапраўды, стане прыступкай да поспеху.