Апошняя вайна пакінула свой след ва ўсіх рэгіёнах Беларусі. У кожным раённым музеі знойдуцца экспанаты, якія раскажуць пра трагедыю і гераізм мясцовых людзей у гады ваеннага ліхалецця, часам унікальныя. Вядома, найбольшая канцэнтрацыя такіх артэфактаў — у спецыялізаваных ваенна-гістарычных музеях, такіх як Беларускі дзяржаўны музей гісторыі Вялікай Айчыннай вайны, Мемарыяльны комплекс «Брэсцкая крэпасць-герой», Дзяржаўны мемарыяльны комплекс «Хатынь». Менавіта гэтыя тры аб’екты сталі ўдзельнікамі праекта выдавецтва «Беларуская энцыклапедыя імя Петруся Броўкі».
— Кожны прадстаўлены ў кнізе экспанат мае сваю непаўторную гісторыю, якая адлюстроўвае падзеі Вялікай Айчыннай вайны і расказвае пра ўклад савецкага народа ў Вялікую Перамогу. Гэта элементы абмундзіравання і амуніцыі савецкіх салдат і палкаводцаў, зброя і тэхніка, якімі заваёўвалася Перамога, старыя фатаграфіі, лісты з фронту, дзённікавыя запісы, іншыя экспанаты, якія з’яўляюцца для нас святымі рэліквіямі, — адзначаюць у выдавецтве.
Немагчыма стрымаць эмоцыі, калі бачыш на старонках фотаальбома пасведчанне аб нараджэнні Аляксандра Жалабковіча, які выжыў у хатынскай трагедыі, карціну франтавога мастака Сяргея Атрошчанкі, напісаную на салдацкіх прасцінах пры вызваленні Гомеля, гімнасцёрку абаронцы Брэсцкай крэпасці лейтэнанта Аляксея Наганава і многае іншае.
mila@sb.by
Фота bel-en.by
