— Паводле звестак на 1 студзеня, 1872 садовыя таварыствы газіфікаваны звадкаваным газам — 50-літровымі балоннымі ўстаноўкамі. Спажыўцамі з’яўляюцца каля 50 тысяч прыватных асоб. Прыродным газам забяспечаны 449 садовых таварыстваў — гэта дзесяць тысяч спажыўцоў, — інфармуе начальнік упраўлення газазабеспячэння і маркетынгу дзяржаўнага вытворчага аб’яднання па паліве і газіфікацыі «Белпалівагаз» Уладзімір Завальнікаў.
Летась і сёлета збояў у рэжыме энергазабеспячэння ў садовых таварыствах не зафіксавана. Спецыяліст выказаў упэўненасць, што пазітыўная тэндэнцыя захаваецца на працягу ўсяго года.
Што тычыцца адказнасці спажыўцоў прыроднага газу, то яна пакідае жадаць лепшага. Пачасціліся выпадкі ўмяшання ў бытавыя прыборы ўліку расходу газу. Людзі зрываюць пломбы і ўмешваюцца ў працу падліковага механізма... За 2020 год выяўлены 184 такія выпадкі. Парушальнікі заплацілі каля 1,9 мільёна рублёў штрафу. Каб не азмрочыць дачны сезон сабе і сваякам, газавікі рэкамендавалі спажыўцам вучыцца на чужых памылках і не хімічыць з лічыльнікамі.
— За 1 кубічны метр прыроднага газу спажывец з 1 студзеня 2021 года павінен заплаціць 50 рублёў 82 капейкі. Балон звадкаванага газу вагой 21 кілаграм, напрыклад, каштуе 46 рублёў 50 капеек, — агучыла цэны начальнік аддзела цэнаўтварэння і тарыфнай палітыкі эканамічнага ўпраўлення дзяржаўнага вытворчага аб’яднання па паліве і газіфікацыі «Белпалівагаз» Вольга Дулько.
Для пенсіянераў, якія не працуюць, і некаторых іншых груп насельніцтва, якія з’яўляюцца ўласнікамі дач і садовых домікаў, прадугледжаны зніжкі. Ім даецца права аплаты па субсідзіраваных дзяржавай цэнах. Вольга Дулько — аб тым, што трэба зрабіць, каб скарыстацца такой опцыяй:
— Неабходны пісьмовая заява ўласніка дачы, а таксама дакументы, якія пацвярджаюць рэгістрацыю па месцы знаходжання. Пенсіянерам, якія не працуюць, патрэбна прадаставіць пенсійнае пасведчанне і працоўную кніжку альбо іншы дакумент, які пацвердзіць, што пенсіянер не працаўладкаваны. Льготнікам — прад’явіць дакумент на атрыманне льгот, а інвалідам — пасведчанне. Важна адзначыць, што тарыф, які субсідзіруецца, дзейнічае з даты падачы заявы.
Тыя, у каго няма магістральнага газаправода, заклапочаны купляй газавага балона. Паўстае пытанне, якія дакументы неабходна атрымаць, каб разжыцца запаветным агрэгатам. Патрабаванні да эксплуатацыі балона прад’яўляюцца строгія, бо, на жаль, маюць месца няшчасныя выпадкі. Для атрымання ўсіх дазваляльных дакументаў спажыўцу трэба звярнуцца ў філіял газазабяспечвальнай арганізацыі, заключыць дагавор і прайсці атэстацыю абсталявання.
Садаводчыя таварыствы і дачныя кааператывы разлічваюцца за спажытую электраэнергію па тарыфах для насельніцтва — 20 рублёў 92 капейкі за 1 кВт*г.
На крадзяжы электраэнергіі ў садовых таварыствах падрабязна спыніўся начальнік упраўлення збыту энергіі дзяржаўнага вытворчага аб’яднання электраэнергетыкі «Белэнерга» Віктар Жыткевіч:
— Рашэннем гэтай праблемы можа стаць вынас прыбораў уліку з садовых домікаў за мяжу зямельнага ўчастка. Часта задаюць пытанне, ці можна ў такіх доміках выкарыстоўваць электраэнергію на ацяпленне і гарачае водазабеспячэнне, пры гэтым плаціць па нізкіх тарыфах. На жаль, пакуль гэта немагчыма, таму што садовыя домікі не адносяцца да жыллёвага фонду, а тарыфы на электраэнергію для ацяплення і гарачага водазабеспячэння ўстаноўлены для жылых памяшканняў.
gorbatenko@sb.by
