26 жніўня вызначыцца прадстаўнік Беларусі на дзіцячым «Еўрабачанні-2016»

На дзіцячым «Еўрабачанні» ўжо даўно ўсё па-даросламу. Па-першае, павялічыўся ўзрост удзельнікаў, і сёння на сцэне ўжо няма мілых дзетак з наіўнымі песнямі, там гаспадараць падлеткі. Па-другое, кампазіцыі пішуцца не пад школьнай партай, а прафесіяналамі. Ды і, па-трэцяе, страсці там кіпяць недзіцячыя. Але ўсё гэта ніколькі не зніжае цікавасць да конкурсу, нават наадварот. Белтэлерадыёкампанія па традыцыі рыхтуе грандыёзны фінал нацыянальнага адборачнага тура, куды патрапілі дзесяць лепшых юных выканаўцаў і калектываў. Заўтра па выніках галасавання журы і гледачоў вызначыцца, хто пад сцягам Беларусі восенню адправіцца на Мальту. А пакуль давайце бліжэй пазнаёмімся з усімі ўдзельнікамі.

Маша, якой хутка споўніцца 12 гадоў, у нацыянальным адборы ўдзельнічае не ўпершыню. Леташняе выступленне яна называе рэпетыцыяй і верыць, што першы нумар ёй дастаўся невыпадкова. Яна ўжо неаднаразова была пераможцай розных музычных конкурсаў і верыць, што вось-вось яна возьме і самую высокую прыступку — дзіцячае «Еўрабачанне». Маша не па гадах разважлівая і да няўдач ставіцца па-філасофску, лічыць іх адной з частак поспеху. Але яе песня пра іншае: людзі перасталі чуць адзін аднаго, дзяўчынка заклікае ўсіх адкласці камп’ютары і тэлефоны, паглядзець адзін аднаму ў вочы і проста пагаварыць.

Гэтыя чатыры вясёлыя дзяўчынкі з Віцебска знаёмыя вельмі даўно, але ў гурт вырашылі аб`яднацца год таму, каб заваяваць міжнародны музычны алімп. Яны з самага пачатку прыдумалі, што хочуць спяваць пра дружбу, з гэтай ідэяй і звярнуліся да Сашы Нэма. На педагогу па вакале таксама не сталі эканоміць і з Віцебска пачалі ездзіць да Вольгі Драздовай, вучань якой, Руслан Асланаў, у мінулым годзе прадстаўляў нашу краіну на дзіцячым «Еўрабачанні». Вельмі цікава паглядзець, што атрымаецца з гэтага супрацоўніцтва. Дарэчы, назва калектыву складаецца з першых літар імён дзяўчынак: Соня, Ніколь і Каця (іх у гурце дзве).

Да конкурсу магіляўчанку рыхтуе Васіль Сянькоў, педагог па вакале Надзеі Місяковай, якая ў 2014-м прадстаўляла Беларусь на дзіцячым «Еўрабачанні». У яго шмат вучняў і з больш гучнымі прозвішчамі, у свой час ён займаўся з Інай Афанасьевай, Ірынай Дарафеевай, Пятром Ялфімавым, Наталляй Падольскай. Не выключана, што зорная будучыня і ў Лены Цітовай. Пакуль жа 12-гадовая дзяўчынка цвёрда ідзе да вызначанай мэты з дэвізам «Усё атрымаецца!». У вольны час захапляецца арыгамі, лепкай. Амаль ва ўсіх яе сяброў ёсць кулончыкі, якія юная артыстка робіць сваімі рукамі.

У гэтым годзе 14-гадовая дзяўчынка пераплыла Днепр, што для яе ўжо велізарная перамога. Але сваю будучыню мінчанка звязвае з музыкай, і поспехаў хацела б дамагчыся ў гэтай справе ўжо зараз. Менавіта таму, калі ўбачыла на нацыянальным адборы на дарослае «Еўрабачанне» Анастасію Малашкевіч, яна з бацькамі вырашыла звярнуцца да яе за дапамогай у вакале. Спявачка не адмовіла. Наадварот, палічыла за гонар папрацаваць з такім голасам. Дарэчы, як і ў нумарах самой Малашкевіч, у юнай артысткі ў фінале не будзе нейкага мегашоу, яна збіраецца браць менавіта вакальнымі дадзенымі. Яе песня — пасыл для сяброў: маючы ў жыцці мэту, трэба ісці да яе дасягнення, нягледзячы на цяжкасці, якія сустракаюцца на шляху.

Стэфанія — прадстаўніца Нацыянальнага цэнтра музычных мастацтваў імя Ул. Мулявіна. Яе педагог — мама дзяўчынкі Алена Ганчарэнка. Яна расказвае, што яшчэ ў калысцы дачка брала ноты лепш, чым некаторыя яе вучаніцы. Таму, чым займацца ў будучыні, было вырашана з ранняга дзяцінства. Зараз Стэфаніі 11 гадоў, яна ўжо шмат разоў паспяхова выступала на міжнароднай сцэне, але верыць, што яе галоўная перамога наперадзе. Куміры ў музыцы ў дзяўчынкі — Адэль і Лара Фабіян.

Прыхільнікам дзіцячай музыкі гэты калектыў добра вядомы. На мінулым нацыянальным адборы выхаванцы дзіцячай школы мастацтваў № 2 Мінска саступілі толькі Руслану Асланаву, які ў выніку і адправіўся ў Балгарыю. Сёння яны збіраюцца зноў натхніць публіку і абяцаюць сапраўднае танцавальнае шоу. Бо і песня пра тое, што трэба адарвацца ад камп’ютарных гульняў і больш рухацца. У групе толькі адзін хлопчык — Ян Мусвідас. Ён не ўтойвае: яму цяжка з дзяўчынкамі, але ён шануе іх калектыў за тое, што яны навучыліся дараваць, дапамагаць і давяраць адзін аднаму.

Маша — яшчэ адна выхаванка Нацыянальнага цэнтра музычных мастацтваў імя Ул. Мулявіна. Яе педагог Святлана Стацэнка, мама той самай Ксені Сітнік, кажа, што песеньку зрабілі пад характар юнай артысткі — рухавую і вясёлую. Яе дэвіз па жыцці — «Падскокваючы (так называецца песня. — Аўт.) i з усмешкай!». Дарэчы, Маша толькі ў гэтым годзе ўжо атрымала тры Гран-пры: на конкурсах у Грузіі, Маскве і Санкт-Пецярбургу. Працяг будзе?..

Зіна — адна з самых старэйшых удзельніц адбору (у верасні ёй споўніцца 14) і, бадай, самая вядомая. Адна яе перамога на дзіцячым «Славянскім базары ў Віцебску» ў 2014-м чаго вартая! А да гэтага яшчэ было лаўрэатства на дзіцячай «Новай хвалі». У нацыянальным адборы яна таксама не пачатковец. У гэтым годзе, каб напэўна трапіць у лік фіналістаў, дзяўчынка прадставіла адразу чатыры песні. Журы больш спадабалася кампазіцыя «Космас», напісаная мастацкім кіраўніком арт-групы «Беларусы» Валерыем Шматам. Перавага Зіны перад іншымі ўдзельнікамі — не толькі вялікі вопыт выступленняў, але і выдатная харэаграфічная падрыхтоўка. Цікава, што яе любімы герой — Дар`я Домрачава.

Оля — яшчэ адна выхаванка Вольгі Драздовай. Педагог па вакале ў захапленні ад стараннасці і мэтанакіраванасці дзяўчынкі. Хоць калісьці першая настаўніца музыкі называла дзяўчынку П`еро і казала, што тая не зможа спяваць і быць паспяховай вакалісткай. Оля перамагла сама сябе і даказала ўсім адваротнае, заваяваўшы мноства ўзнагарод на міжнародных конкурсах. Хоць музыка — не адзінае яе захапленне ў жыцці. Яна — актыўны відэаблогер: сама здымае, манціруе відэа пра сваё жыццё і выкладвае яго пад нікам #OLGALOVA на свой YouTube-канал, на якім, дарэчы, ужо больш за 42 тысячы праглядаў. Юная артыстка кажа, што падрыхтавала сапраўдную музычную бомбу. Песня «Сэрца біт» амаль аўтабіяграфічная: трэба быць моцнай, дамагацца пастаўленых мэт і ісці толькі наперад.

Саша — хлопец вельмі актыўны і рознабаковы. Ён танцуе хіп-хоп і брэйк-данс, чытае рэп і асвойвае тэхнікі бітбокса, здымаецца ў рэкламе, вядзе канцэрты і тэлеперадачы на расійскім тэлеканале «Карусель». Яшчэ ён студэнт Акадэміі папулярнай музыкі Ігара Крутога ў Маскве. У роднай Беларусі юны артыст займаецца ў тэатры эстраднай песні «Хвілінка» пад кіраўніцтвам Таццяны Трухан. Песня, якую для Сашы напісаў малады беларускі артыст Кірыл Ермакоў, пра імкненне знайсці сябе ў музыцы, прысвяціць сваё жыццё сцэне, пакінуўшы прыкметны след.

stepuro@sb.by