Мантаж сцэны “Мінск-Арэны” ўжо завершаны. Маштаб працы ўражвае: 20 фур абсталявання, у тым ліку каля 1000 светлавых прыбораў, дзве сцэны, грынрум, доўгія подыумы, якія цягнуцца ў зал... І ўсё нібы лунае ў зорным небе. Нездарма слоган і лагатып конкурсу гэтага года — “Запальвай!”. Аўтар афармлення — мастак-пастаноўшчык Белтэлерадыёкампаніі Галіна Гоманава. Гэта першы выпадак на дзіцячым “Еўрабачанні”, калі сцэнаграфіяй займаецца спецыяліст з краіны-арганізатара. Звычайна такая справа даручаецца прафесіяналам Еўрапейскага Вяшчальнага Саюза.
Убачыць, як “Мінск-Арэна” ператварылася са спорткомплексу ў музычную касмічную пляцоўку, і паназіраць за выступленнямі артыстаў можна будзе не толькі ў дзень фіналу — 24 лістапада адбудзецца генеральная рэпетыцыя, якая поўнасцю паўтарае галоўнае шоу.
А пакуль беларусы рыхтуюцца да дзіцячага “Еўрабачання”, у свеце актыўна абмяркоўваюць правядзенне дарослага конкурсу, які пройдзе ў маі наступнага года ў Тэль-Авіве. Нядаўна на афіцыйным сайце “Еўрабачання” з’явілася інфармацыя, што на 64-ы конкурс прыедуць удзельнікі з 42 краін.
