Важнай палітычнай падзеяй — падзеяй года, не менш — стала правядзенне Усебеларускага народнага сходу. Па сутнасці, гэта маштабны форум, які вызначае рух краіны як мінімум на бліжэйшыя пяць гадоў. Выверанасць калектыўнай пазіцыі, якая фарміравалася менавіта на сходзе, мае прынцыповае значэнне.
Тэме Усебеларускага сходу прысвечана цэлая серыя матэрыялаў у гэтым выпуску часопіса.
Нельга не сказаць яшчэ пра адну падзею, якая ў большай ступені мае міжнародны характар.
Размова пра саміт Шанхайскай арганізацыі супрацоўніцтва, у якім Беларусь упершыню прымала ўдзел у статусе назіральніка. Так, краіна паступова, але ўпэўнена, займае паўнапраўнае месца ў адной з уплывовых глабальных структур. Першапачаткова задачы ШАС ляжалі ў сферы ўнутрырэгіянальных дзеянняў па спыненні тэрарыстычных актаў, сепаратызму і экстрэмізму ў Сярэдняй Азіі. Аднак па меры развіцця арганізацыі пытанні бяспекі былі дапоўнены эканамічным блокам, уключаючы энергетыку, транспарт, АПК, тэлекамунікацыі, а таксама гуманітарным вымярэннем. На думку Прэзідэнта менавіта Беларусі, эканамічная кааперацыя павінна стаць магістральным напрамкам узаемадзеяння ў Шанхайскай арганізацыі супрацоўніцтва.
Чытайце публікацыю “Дарожная карта” актыўных дзеянняў”.
Зрэшты, насычанасць жыцця складваецца не толькі з падзей, няхай і найважнейшых, чыста палітычнага зместу. Не менш важным уяўляецца злабадзённасць спраў, якія, уласна, і пацвярджаюць рэальнасць палітычных намераў. Каб вялікая колькасць планаў не аказалася фікцыяй. Добры прыклад той, які матэрыялізуе некалі намечанае ў ажыццёўленае. Публікацыя “Атрымаць месца ў вёсцы, не выязджаючы з горада” якраз расказвае пра такое. Вось невялікая вытрымка з матэрыялу:
“Усяго шэсць гадоў назад тут была пустка. Ускраіна Мінска. Але блізкасць да карпусоў Беларускага дзяржаўнага медуніверсітэта і станцыі метрапалітэна прымусілі прыгледзецца да месца больш уважліва. Так, адна за адной выраслі сем прыгожых шматпавярховак. Комплекс будынкаў назвалі “Студэнцкая вёска”.
За некалькі гадоў новенькія інтэрнаты абраслі магазінамі і гандлёвымі цэнтрамі. Быў узведзены спартыўны комплекс. Не так даўно ў прыбудове аднаго з інтэрнатаў адкрылі яслі-сад, якія прымаюць не толькі дзетак студэнцкіх сем’яў, але і з суседняга спальнага мікрараёна Брылевічы. Хутка ў маладзёжным гарадку адкрыюцца гасцініца, паліклініка, пункты бытавога абслугоўвання, падземныя аўтастаянкі, культурна-забаўляльны цэнтр. Інфраструктуру абяцаюць круцейшую, чым у кампусах некаторых еўрапейскіх універсітэтаў.
І напрыканцы невялікі культурны экскурс. Сёння відавочна, што атрыманне суверэнітэту Рэспублікай Беларусь у 1991 годзе азнаменавала і цалкам новы этап мастацкай культуры. За гады незалежнасці ў грамадстве адбыліся істотныя змены, пачаўся працэс абнаўлення, рэалізацыі інтэлектуальнага і творчага патэнцыялу. З асаблівасцямі развіцця айчыннага мастацтва ў кантэксце традыцый і сучаснасці, творчай пераемнасці і эксперыментальных пошукаў знаёміць выстава “Сучасная Беларусь вачамі мастакоў”, якая адкрылася ў Нацыянальным мастацкім музеі
Часопісная публікацыя пра выставу прадстаўлена матэрыялам “Карціны як факты з біяграфіі краіны”.
Але лепш знайсці час і асабіста пабываць на выставе. Яна таго вартая.
Віктар Харкоў
